دۆناڵد ترەمپ، سەرۆکی ئەمریکا، ڕایگەیاند کە هێزی دەریایی وڵاتەکەی سەرجەم ئەو مینانەیان لاداوە یان تەقاندووەتەوە کە لە ناو ئاوە نێودەوڵەتییەکانی گەرووی هورمزدا جێگیر کرابوون. ترەمپ لە پەیامێکی تونددا هۆشداریی دایە تاران و وتی، هەر کەشتی یان بەلەمێکی ئێرانی هەوڵی دانانی مینی نوێ بدات، "دەستبەجێ و بە شێوەیەکی سیستماتیک" تێکدەشکێندرێت.
بەپێی پەیامەکەی سەرۆکی ئەمریکا، لە ڕێگەی هێزی بۆشایی ئاسمانییەوە (Space Force) چاودێریی وردی هەموو بستێکی گەرووی هورمز دەکرێت. ترەمپ ئاماژەی بەوەش کرد کە ئەوان سیاسەتی "لێبوردەیی سفر" بەرامبەر بە دانانی مین پەیڕەو دەکەن و جەختی کردەوە کە پێشتر سێ وێستگەی ئەتۆمی و ناوچەی "چیای پیکاكس" (Pickaxe Mountain) تێکشکێندراون، ئەمەش وەک ئاماژەیەک بۆ ئامادەیی هێزەکانی ئەمریکا بۆ هەر ڕووبەڕووبوونەوەیەک.
گەرووی هورمز یەکێکە لە گرنگترین ڕێڕەوە ئاوییەکانی جیهان بۆ گواستنەوەی وزە، کە نزیکەی 20%ی نەوتی خاوی جیهانی پێدا تێپەڕ دەبێت. لە ساڵانی ڕابردوودا ئەم ناوچەیە بووەتە چەقی گرژییە سەربازییەکانی نێوان واشنتن و تاران، و چەندین جار هەڕەشەی داخستنی یان تێکدانی ئاسایشی کەشتیوانی لەو ڕێڕەوەدا کراوە. ئیدارەی ئەمریکا پاراستنی ئازادیی کەشتیوانی لە گەرووی هورمز بە یەکێک لە کارە لەپێشینەکانی ئاسایشی نیشتمانی و جێگیریی ئابووریی جیهانی دەزانێت و هەر جۆرە هەوڵێک بۆ تێکدانی ئاسایشی ئەو ناوچەیە بە هێڵی سوور دادەنێت.
