دۆناڵد ترەمپ، سەرۆکی ئەمریکا، جارێکی دیکە هێرشی توندی کردە سەر دەسەڵاتدارانی تاران و ڕایگەیاند، کە سەرکردایەتی سیاسی و سەربازیی ئەو وڵاتە متمانەیان پێ ناکرێت و بە شێوەیەکی "فێڵبازانە" مامەڵە دەکەن.
سەرۆکی ئەمریکا لە نوێترین لێدوانیدا سەبارەت بە ململانێکانی نێوان واشنتن و تاران، وەسفی سەرکردایەتی ئێرانی کرد بەوەی کە "بە شێوەیەکی باوەڕپێنەکراو فێڵبازن" (Unbelievably deceitful). ئەم پەیامە توندەی ترەمپ لە کاتێکدایە کە تاران لە ڕێگەی سوڵتاننشینی عومانەوە پەیامی ئامادەیی بۆ گفتوگۆ و کردنەوەی ڕێڕەوێکی ئارامی کاتی لە گەرووی هورمز ناردووە.
چاودێرانی سیاسی ئاماژە بەوە دەکەن کە ئەم لێدوانەی ترەمپ نیشانەی ئەوەیە کە واشنتن هێشتا گومانی زۆری لە جیدییەتی ئێران هەیە بۆ گەیشتن بە ڕێککەوتنێکی ڕاستەقینە. سەرۆکی ئەمریکا پێشتریش هۆشداری دابوو کە "وەستانی کاتیی بۆردومانەکان" تەنها بۆ پێدانی دەرفەتە بە دیپلۆماسی، بەڵام جەختی کردەوە کە ئەگەر تاران پەنا بۆ فێڵ و دواخستنی کات ببات، ئەوا ئەمریکا بە هێرشێکی "بێوێنە و وێرانکەر" وەڵام دەداتەوە.
ئەم گرژییە زارەکییانە لە کاتێکدایە کە ململانێی نێوان ئەمریکا و ئێران چووەتە ١٥هەمین ڕۆژی خۆیەوە. دوای ١٣ شەوی بەردەوام لە بۆردومانکردنی ئامانجە سەربازییەکانی سوپای پاسداران، ئێستا جۆرێک لە "بێدەنگیی مەترسیدار" باڵی بەسەر ناوچەکەدا کێشاوە. لە لایەک واشنتن مەرجی توندی بۆ ئاساییکردنەوەی دۆخەکە داناوە، و لە لایەکی دیکەشەوە تاران هەوڵ دەدات لە ڕێگەی عومانەوە فشارە سەربازی و ئابوورییەکانی سەر وڵاتەکەی سووک بکات.
ئەم لێدوانە نوێیەی ترەمپ نیشانی دەدات کە ئاستی متمانە لە نێوان هەردوو و لایەندا لە نزمترین ئاستی مێژووییدایە، ئەمەش ئەرکی ناوبژیوانەکان بۆ گەیشتن بە ئاگربەستێکی هەمیشەیی یەکجار قورس و ئاڵۆز دەکات.
