حكوومەتی ڤەنزوێلا بە فەرمی بڕیاریدا بە ڕاگەیاندنی 7 ڕۆژ ماتەمینیی نیشتمانی لە سەرتاسەری وڵاتدا، ئەمەش وەک ڕێزێک بۆ گیانی ئەو سەدان کەسەی کە بەهۆی دوو بوومەلەرزە بەهێزەکەی چەند ڕۆژی ڕابردووەوە گیانیان لەدەستدا.
بەپێی بڕیارەکەی حكوومەت، لە ماوەی ئەو هەفتەیەدا ئاڵای وڵات لەسەرجەم دامەزراوە فەرمییەکان و نوێنەرایەتییە دیپلۆماسییەکان لە دەرەوە بۆ نیوە دادەگیرێت. هەروەها تەواوی چالاکییە ئاهەنگگێڕانەکان و بۆنە فەرمییەکان هەڵوەشێنراونەتەوە، تاوەکو وڵات تەرکیز بخاتە سەر ئۆپەراسیۆنەکانی گەڕان و ڕزگارکردن و یارمەتیدانی لێقەوماوان.
ئەم هەنگاوە لە کاتێکدایە کە ژمارەی قوربانیانی "بوومەلەرزە دووانەییەکە" کە گوڕەکەی گەیشتە 7.5 پلە، بەردەوام لە بەرزبوونەوەدایە و تاوەکو ئێستا گیانلەدەستدانی زیاتر لە 1,450 کەس پشتڕاست کراوەتەوە. حكوومەتی ڤەنزوێلا جەختی کردەوە کە ئێستا هەموو تواناکانی دەوڵەت و هاوکارییە نێودەوڵەتییەکان بۆ کەمکردنەوەی کاریگەرییەکانی ئەو کارەساتە سروشتییە تەرخانکراون کە زیانێکی گەورەی بە كاراكاسی پایتەخت و ناوچەکانی دەوروبەری گەیاندووە.
