یسرائیل کاتس، وەزیری بەرگریی ئیسرائیل، ڕایگەیاند کە سوپای وڵاتەکەی بانکێکی گەورەی لە ئامانجی سەربازی و ستراتیژی لە ناو خاکی ئێراندا ئامادە کردووە، بەڵام لە ئێستادا ئیسرائیل هیچ هەنگاوێکی سەربازیی کتوپڕ نانێت بۆ ئەوەی ڕێگری لە کارنامەی سیاسی و دیپلۆماسیی دۆناڵد ترەمپ، سەرۆکی ئەمریکا نەکات.
کاتس لە لێدوانێکی نوێدا ئاشکرای کرد، کە لەگەڵ فەرماندەی فەرماندەیی ناوەندیی هێزەکانی ئەمریکا (CENTCOM) گەیشتوونەتە ڕێککەوتن لەسەر ئەوەی کە هێزەکانی ئیسرائیل لەو "ناوچە ئەمنییانە" ناکشێنەوە کە لە باشووری لوبنان، سووریا و کەرتی غەززەدا دروستیان کردووە. ئەم هەڵوێستە نیشانەی ئەوەیە کە حکوومەتی ئیسرائیل سوورە لەسەر مانەوەی هێزەکانی لەو ناوچانە وەک قەڵغانێکی ئەمنی بۆ پاراستنی سنوورەکانی، سەرەڕای هەوڵە نێودەوڵەتییەکان بۆ هێورکردنەوەی دۆخەکە.
وەزیری بەرگریی ئیسرائیل تیشکی خستە سەر کاریگەریی ئێران لەسەر جەنگی لوبنان و ڕایگەیاند، ئەگەر ئەو پەیوەندییە ستراتیژییەی نێوان تاران و بەیرووت نەبوایە، گرووپی حیزبوڵا تاوەکو ئێستا بەتەواوی داڕووخابوو. کاتس پێیوایە کە بەستنەوەی بەرەکانی شەڕ لەلایەن ئێرانەوە، تەنها هۆکارە کە وای کردووە حیزبوڵا بتوانێت لە بەرامبەر فشارە سەربازییەکاندا بمێنێتەوە.
ئەم لێدوانانە لە کاتێکدایە کە ناوچەی ڕۆژهەڵاتی ناوەڕاست لە ساڵی 2026دا بە قۆناغێکی هەستیاردا تێدەپەڕێت. ئیدارەی ترەمپ هەوڵ دەدات لە ڕێگەی دانوستان و فشارەوە ڕێککەوتنێکی نوێ لەگەڵ تاران ئەنجام بدات، لە بەرامبەریشدا ئیسرائیل دەیەوێت دڵنیایی وەربگرێت کە هەر جۆرە ڕێککەوتنێک، دەستکەوتە سەربازییەکانی لە غەززە و لوبنان و سووریا ناخاتە مەترسییەوە.
