خالید حەنەفی، وەزیری فەرمان بە چاکە و ڕێگری لە خراپەی حکوومەتی تاڵیبان، لە کۆبوونەوەیەکدا لەگەڵ ژمارەیەک لە پیاوماقوڵانی هۆزەکان ڕایگەیاند، کە حکوومەتەکانی ڕابردووی ئەفغانستان سەرەڕای ئەوەی پاڵپشتییەکی نێودەوڵەتی بەهێزیان هەبوو، بەڵام نەیانتوانی بەردەوام بن و ڕووخان.
حەنەفی ئاماژەی بەوە کرد کە دەسەڵات و پۆست وەفای بۆ هیچ کام لە سەرۆکەکانی پێشووی ئەفغانستان نەبووە. ئەو وتی: "لە نور محەمەد تەرەکییەوە تا نەجیب و پاشان تا ئەشرەف غەنی، هیچ پۆست و مەقامێک بۆ کەس وەفادار نەبووە و نەمایەوە."
ناوبراو سیستەمی ئێستای تاڵیبانی بە سیستەمێکی "ئیلاهی" وەسف کرد و داوای لە خەڵک کرد یەکگرتوو بن بۆ بەهێزکردنی پایەکانی ئەم دەسەڵاتە.
جێگەی ئاماژەیە، خالید حەنەفی لە قسەکانیدا تەنها باسی ڕووخانی حکومەتە نەیارەکانی تاڵیبانی کرد و هیچ ئاماژەیەکی بە هۆکارەکانی ڕووخانی یەکەمین خولی دەسەڵاتی تاڵیبان لە ساڵی 2001 نەکرد.
