کریس ڕایت، وەزیری وزەی ئەمریکا، لە لێدوانێکی نوێدا دڵنیایی دایە بازاڕەکانی جیهان و ڕایگەیاند کە واشنتن پابەندە بە پاراستنی ڕێڕەوی گواستنەوەی وزە لە ڕۆژهەڵاتی ناوەڕاست، بەتایبەت لە گەرووی هورمز.
وەزیری وزەی ئەمریکا جەختی کردەوە کە تەنانەت ئەگەر هیچ ڕێککەوتنێکی سیاسی یان ئەمنی لەگەڵ ئێراندا ئەنجام نەدرێت، ئەمریکا ڕێگە دەدات نەوت بە شێوەیەکی ئاسایی بە گەرووی هورمزدا تێپەڕێت. ئەم پەیامەی کریس ڕایت وەک ئاماژەیەک دەبینرێت بۆ ئەوەی کە ئەمریکا ڕێگە نادات هیچ لایەنێک بازرگانیی نەوت پەکبخات یان گەرووەکە وەک فشارێک بەکاربهێنێت.
ئەم لێدوانانە لە کاتێکدایە کە پێشتر دۆناڵد ترەمپ باسی لە ئەگەری سەپاندنی باج و سەرانە کردبوو لە گەرووی هورمز، بەڵام وەزیری وزە تیشک دەخاتە سەر لایەنە ستراتیژییەکەی و جەخت دەکاتەوە کە ئامانجی سەرەکیی واشنتن پاراستنی سەقامگیریی نرخەکان و انسیابی گواستنەوەی نەوتە بۆ بازاڕەکانی جیهان.
گەرووی هورمز یەکێکە لە هەستیارترین ڕێڕەوە ئاوییەکانی جیهان و نزیکەی **20%**ی نەوتی جیهانی پێدا تێپەڕ دەبێت. چاودێران پێیان وایە ئەم هەڵوێستەی وەزیری وزە پەیامێکی ڕوونە بۆ تاران کە ئەمریکا بە ئامادەیی سەربازی و دیپلۆماسییەوە پارێزگاری لەو ڕێڕەوە نێودەوڵەتییە دەکات و ڕێگە بە دروستبوونی قەیرانی وزە نادات.
