وەزیرانی دەرەوەی وڵاتانی گروپی حەوت (G7) سەرکۆنەی هێرشی حووسییەکانی یەمەنیان بۆ سەر سعوودیە کرد و داوای ڕاگرتنی دەستبەجێی سەرجەم کردەوە سەربازییەکان و هێرشەکانی سەر کەشتیوانیی مەدەنییان لێکردن.
وەزیرانی دەرەوەی وڵاتانی گروپی حەوت (کەنەدا، فەڕەنسا، ئەڵمانیا، ئیتاڵیا، ژاپۆن، بەریتانیا و ئەمەریکا) لە ڕاگەیەندراوێکی هاوبەشدا، هێرشە بەردەوامەکانی حووسییەکانی یەمەنیان بۆ سەر خاکی سعوودیە بە قبووڵنەکراو ناو برد و بە توندی سەرکۆنەیان کرد.
لە ڕاگەیەندراوەکەدا هاتووە: "داوا لە حووسییەکان دەکەین دەستبەجێ سەرجەم کردەوە سەربازییەکان، تەواوی هەڕەشەکان و هێرشەکانی سەر کەشتیوانیی مەدەنی ڕابگرن، هەروەها بە نیازپاکی و بە شێوەیەکی ئەرێنی بگەڕێنەوە بۆ پرۆسەی سیاسی".
هەر لە ڕاگەیەندراوەکەدا، وەزیرانی دەرەوەی گروپی حەوت داوایان لە ئێرانیش کرد کە کۆتایی بە پڕچەککردن و پاڵپشتیکردنی هێزەکانی حووسی بهێنێت.
