تاقیکردنەوەیەکی نوێی کلینیکی ئاشکرای کردووە کە حەبێکی نوێی ڕۆژانە دەتوانێت بە هەمان کوالێتیی دەرزییەکانی ئۆزێمپیک کاریگەریی هەبێت لە چارەسەرکردنی نەخۆشیی شەکرەی جۆری 2دا.
بە شێوەیەکی گشتی، نەخۆشانی شەکرەی جۆری 2 کە جەستەیان ناتوانێت بە شێوەیەکی کارا ئەنسۆلین بەکاربهێنێت، پەنا بۆ دەرمانی میتفۆرمین یان دەرزییەکانی وەک ئۆزێمپیک دەبەن کە هاوشێوەی هۆرمۆنێکی سروشتی کار دەکەن بۆ هاندانی پەنکریاس تا ئەنسۆلینی زیاتر بەرهەم بهێنێت. بەڵام توێژەرانی نەخۆشخانەیەکی پەکین لە چین دەڵێن حەبێکی فەرمووی نوێ دەبێتە جێگرەوەیەکی ئاسانتر بۆ ئەو دەرزییانە.
لە تاقیکردنەوەکەدا دەرمانێکی نوێ بە ناوی (HRS-7535) لەسەر 194 کەسی پێگەیشتوو تاقی کراوەتەوە. دوای تێپەڕبوونی 16 هەفتە بەسەر وەرگرتنی دەرمانەکەدا، دەرکەوتووە کە ئاستی هیمۆگڵۆبینی شەکرە بە شێوەیەکی بەرچاو دابەزیوە.
ئەنجامە سەرەکییەکانی تاقیکردنەوەکە:
- بەکارهێنانی ژەمە دەرمانی 60 ملگم، ئاستی HbA1c بە ڕێژەی 1.82% کەمکردووەتەوە.
- نزیکەی 2 لەسەر 3ی ئەو نەخۆشانەی ژەمی 60 ملگمیان وەرگرتووە، گەیشتوونەتە ئاستی
HbA1c خوار 7%، کە ئامانجێکی سەرەکییە بۆ ڕێگریکردن لە جەڵتەی دڵ، نەخۆشیی گورچیلە و لەدەستدانی بینین.
- کاریگەریی ئەم حەبە لە کاریگەریی دەرزییە باوەکان (کە 1.0% بۆ 1.5% شەکرە کەمدەکەنەوە) زیاتر بووە.
توێژەران ئاماژەیان بەوە کردووە کە نیشانە لاوەکییەکانی دەرمانەکە وەک دڵتێکهەڵاتن و سکچوون سووک بوون. هەرچەندە ئەنجامەکان ئومێدبەخشن، بەڵام دەرمانەکە هێشتا لە قۆناغی 2ی تاقیکردنەوەکاندایە و پێویستی بە قۆناغی 3 هەیە کە هەزاران نەخۆش دەگرێتەوە، پێش ئەوەی بە فەرمی وەک چارەسەر پەسەند بکرێت و بخرێتە بازاڕەوە.
