Îro sêşemê li bajarê Efrînê yê Rojavayê Kurdistanê hejmarek xwendekarên Kurd xwepêşandan li dar xistin û daxwaza xwendinê bi zimanê dayikê kirin.
Li ser bangewaziya Komeleya Xwendekarên Efrîn û Helebê, îro sêşemê xwepêşandanekî nerazîbûnê li bajarê Efrînê hate lidarxistin; di wê de xwendekaran daxwaza çareserkirina pirsgirêka xwendina xwe bi zimanê Kurdî û tevlîkirina wan di pêvajoya perwerdeyê de kir.
Xwepêşandan li ber dibistana (Newrozê), li ser riya Raco ya navenda bajarê Efrînê hate lidarxistin. Beşdaran bi bilindkirina dirûşmên "Bê ziman jiyan tune ye" û "Ziman, hebûn û nasname ye", daxuyaniyek nerazîbûnê xwendin.
Di daxuyaniyê de ji aliyên têkildar hat xwestin ku pirsgirêka xwendinê bi zimanê Kurdî çareser bikin û mamoste û xwendekarên ku ji Herêma Cezîrê vegeriyane dîsa tevlî pêvajoya xwendinê bikin. Her wiha daxwaz kirin ku biryara Wezareta Perwerdeyê ya derbarê destnîşankirina "qonaxa derbasdar" bixin ber cîbicîkirinê.
Di beşekî din ê nerazîbûnê de hate destnîşankirin ku, tevî ku nêzîkî du mehan e deriyên dibistanan hatine vekirin, lê heta niha nêzîkî hezar xwendekarên pola nehan û dwanzdehan ji xwendinê bêpar mane û li benda destpêkirina qonaxa derbasdar in.
Nûneratiya xwendekaran di dema xwepêşandan û nerazîbûnê de bîranîn û daxwazên xwe radestî Arif Sîdo, berpirsê civaka perwerdeyê ya Efrînê, kir.
