Serokê Hikûmeta Herêma Kurdistanê pêşwazî li berpirsê Balyozxaneya Amerîkayê li Iraqê kir û mijarên vekirina Parlamentoyê, pêkanîna kabîneya nû û pêdiviya diyarkirina 14.14% ji budceya 2027 ji bo Herêma Kurdistanê hatin nîqaşkirin.
Îro Çarşem 21ê Cotmeha 2026, Mesrûr Barzanî, serokê Hikûmeta Herêma Kurdistanê, pêşwazî li balyoz Steve Fagen, berpirsê Balyozxaneya Amerîkayê li Iraqê, kir.
Di civînê de, ku Gwendolyn (Wendy) Green, konsula giştî ya Amerîkayê li Herêma Kurdistanê, amade bû, herdu alî li ser pêşxistina bêtir a têkiliyên dualî û girîngiya parastina ewlehî û stabîlîzasyona Herêma Kurdistanê li hev kirin.
Berpirsê Balyozxaneya Amerîkayê pabendbûna welatê xwe bi domandina piştgiriya Herêma Kurdistanê re anî ziman.
Serokê Hikûmetê spas û pêzanîna Herêma Kurdistanê ji bo piştgiriya Amerîkayê dubare kir.
Herdu aliyan li ser pêdiviya vekirina Parlamentoya Kurdistanê û pêkanîna kabîneya nû ya Hikûmeta Herêma Kurdistanê tekez kirin.
Di beşekî din ê gotûbêjan de, mafên destûrî û şayistiyên darayî yên Herêma Kurdistanê hatin nîqaşkirin. Serokê Hikûmetê dubare kir ku pêdivî ye para budceya Herêmê ji budceya giştî ya federal ji bo sala 2027 bi awayekî dadperwerane û li gorî rêjeya 14.14% a nifûsa Herêma Kurdistanê were veqetandin.
