Serokê hikûmetê: Em ê hemû hewldanê bikin ku ji bo ciwan û derçûyên xwe cihê kar peyda bikin

Ew zanista ku we wergirtiye û ew xwendina we, dibe amûrek û serişteyek di destê we de da ku hûn bikaribin zêdetir xizmeta xwe, kesûkarê xwe û welatê xwe bikin.

Zanist tiştekî baş e, lê zanist bêyî ku mirov ji welatê xwe hezkirinek hebe, temam nîne. Hêviya min ew e ku çiqas hûn fêr bibin û çiqas bixwînin, têkilî û evîna xwe bi welatê xwe re çêbikin, da ku bikarin zêdetir xizmeta welatê xwe bikin. Welatê we li benda we ye, paşeroja welatê we di destê we de ye. Hûn dikarin welatê xwe avadantir bikin, baştir bikin, pêş ve bibin. Guhê xwe nedin tu kesî û rê nedin kesekê ku we bêhêvî bike. Guh nedin tu kesî ku we ji hezkirina welatê xwe dûr bixe. Em xelkê vî welatî ne; ax û welat û destkeftiyên me, berhema xwîna şehîdên me ye, westiyana pêşmergeyên me ye, û gelek ji wan kes û karê we ne. Ji bo bilind ragirtina xizmeta wan şehîdan û wan pêşmergeyan û qurbankirina wan, divê em welatê xwe û wan destkeftiyan biparêzin. Ev berpirsiyariyê ji îro ve dikeve ser milê we. Hêviya min ew e ku ji bilî ku hûn ji welatê xwe hez bikin, divê hûn biparêzin; divê hûn jî hawîrdora vî welatî biparêzin, ji ber ku parastina hawîrdora me ji bo avakirina welatekî saxlem, avadan û paqij, ji bo nifşên piştî we jî baştir dibe ku tên.

Xwişk û birayên hêja û delal

Ez dizanim ji bo we hêsan nebûye û gelek ji we dixwazin ku rola xwe di civak û komelgeha xwe de bibînin, da ku xizmeteke zêdetir ji welatê xwe re bikin. Li dinyayê tu welatekî wiha nebûye bêyî ku gelê wî welatî zehmet kişandibe û xwe westandibe ji bo avadaniya welatê xwe, û kesekî ji derveyî welatê wan nehatîye ku xizmeta wan bike. Ew bi xwe biryara wan ew bûye ku welatê xwe ava bikin. Ji vir ve hêviya me ew e ku her tişt çi bibe, biryar di destê we de ye. Guhê xwe nedin kesî; hûn dikarin welatê xwe zêdetir ava bikin û zêdetir pêş ve bibin. Ya ku li ser hukûmetê ye, ew e ku alîkariya we bike û derfetên we rêk bixe. Mixabin ew pêşketina ku niha hûn li Kurdistanê dibînin, bê asteng nebûye; belkî gelek astengî li ber me hatine danîn. Eger neba, îro Kurdistana me di qonaxeke pir baştir û pêşketîtir de bû. Gelek nebaşan em nabînin serkeftin û pêşketina welatê me; hewl dan ku nehêlin em pêş ve biçin û nehêlin em serkeftî bibin, lê berxwedana gelê me û berxwedan û zehmeta we û qurbankirina pêşmerge û kes û karê we, bûn sedema ku Kurdistan roj bi roj pêşketîtir û serkeftîtir bibe.

Ev li ser we dimîne û biryar di destê we de ye, ka hûn çiqas dixwazin xwe westînin. Ji vir ve, wekî hukûmet, me hemû hewldana xwe daye û em ê bi hukûmeta federal re jî bidomînin ji bo ku ji bo derfetên kar û damezrandina derçûyên zanîngehê alîkariya zêdetir pêk were. Mixabin ji sala2013 ve heta niha, hukûmeta federal nehêlaye kesek ji Herêma Kurdistanê were damezrandin, lê em nesekiniyane. Ewqas projeyên ku li vir hatine kirin, berhema têkoşîn û zehmeta we bixwe ne. Sektora taybet li Herêma Kurdistanê bi hukûmetê re alîkar bûye ji bo ku em bikarin gav bi gav pêş ve biçin û tu sedem û tu asteng nikaribe karwanê pêşketinê li Herêma Kurdistanê bisekinîne.

Em îro jî bi hukûmetê re didomînin ji bo ku damezrandin di asta hukûmeta federal de were çareserkirin, da ku em bikarin vê derfetê ji bo derçûyên zanîngehê û xelkê Kurdistanê zêdetir bikin, lê ev bi tenê bes nîne. Bernameya hukûmetê ew e ku em derfetên kar di sektora taybet de zêdetir bikin û Em dê bi sektora taybet re hevkarî bikin, da ku ev sektor roj bi roj bikare pêşdetir here û derfetên zêdetir ji we re çêbike, da ku hûn bikarin di warê karê xwe de tiştê ku xwendine û zanista ku hûn lê hene, û ezmûn û pisporiya xwe, zêdetir bikar bînin. Ev soz e ku em dê li ser vê yekê berdewam bin, da ku em bi hev re hevkarî bikin; hûn çiqas li benda hikûmetê ne, em jî ewqas li benda zehmet û piştgiriya we ne. Hikûmet tiştekî cuda ji we nîne, beşek ji we ye; hûn hikûmetê pêk tînin. Paşeroja we û hikûmeta pêşerojê dê cihê we tê de hebe; hûn dikarin welatê xwe bigihînin wê astê ku hûn dixwazin. Hêviya min ji we ew e ku careke din bi hev re, bi hikûmeta xwe re hevkar bin û nehêlin tu kes we bêhêvî bike. Em ne westiyayî dibin, ne jî bêhêvî dibin, û roj bi roj serkeftî dibin.

Ez dixwazim li vir behsa hin mijarên taybet ên îro bikim ku ji bo we hemûyan girîng in. Yek ji wan têkiliyên me ne bi hikûmeta federal re ye. Bi vê hikûmeta nû re me gavên baş avêtine û têkiliyên me ber bi çareserî û baştirbûnê ve diçin. Me piştgiriya xwe ji bo serokwezîr û hikûmeta nû ya federal ragihandiye û ew dizanin ku daxwaza me pêkanîna destûr û şertên me ye, ji bo piştgiriya tevahî, pêkanîna destûr û amadekirin û pêkanîna hemû mafên gelê Kurdistanê. Em dê di parastina mafên gelê xwe de berdewam bin, di her warî de û di her demê de. Niha gelek ji wan pirsgirêkan ku hene hatine çareserkirin û gelek jî mane, lê em dê berdewam bin da ku ew jî werin çareserkirin.

Di van çend rojên borî de, we dît ku hêzên hevalbend dawî li erkên xwe anîn, wek erkên hevalbendiyê li dijî DAIŞê. Em bi navê gelê Kurdistanê û bi navê we hemûyan spasî hêzên hevalbend dikin ji bo piştgiriya wan û hevkariya wan bi hêza Pêşmerge re, ku hêzeke şerker bû ji bo têkbirina hêza terorê. DAIŞ bi destê Pêşmerge hate têkbirin. Rast e, hevkariya hevalbendan pir bû, lê qehremanê têkbirina terorê Pêşmerge bû. Ew Pêşmerge jî kesûkarên we bûn. Ji ber vê yekê careke din hem spasî hevalbendan dikin û di heman demê de gelek spasî Pêşmergeyên xwe dikin ji bo wê destkefta mezin ku hemû cîhan bi wê serbilind dibe.

Em spasî hevalbendan dikin, lê dixwazim hûn jî bizanin: heya ku em xwediyê wan Pêşmergeyan in, Kurdistan ewle û parastî ye. Bila qet kesek li wê neyê ku Kurdistan piştî çûna hevalbendan dê ji bo dijmin û nehezkiriyên me bibê pariyek hêsan, ji ber ku Kurdistan bi destê Pêşmerge hatiye parastin û bi destê Pêşmerge jî bi aramî û parastî dê bimîne, înşalallah.

Derketin an jî qedandina erkê hevalbendan wateya wê nîne ku têkiliyên me bi hevalbendan re bi dawî hatine. Awayê têkildarbûna me bi hevalbendan re guherîye. Erkê hevalbendan ji bo şerê li dijî DAIŞê bû, lê têkiliyên me li asta Iraqê, yanî li asta Herêma Kurdistanê bi hevalbendan re bi awayekî din dê berdewam bin. Ew têkilî dê berdewam be, piştgiriya welatên dostên me ji bo Herêma Kurdistanê dê berdewam be. Lê dîsa ez dubare dikim: pişta me bi Xwedê germ e, bi Pêşmergeyên me germ e û bi we germ e. Ev bawerî di nav gelê me de dê berdewam bike. Hem baweriya we bi hikûmetê cihê serbilindî û şanaziyê ye, hem baweriya hikûmetê bi we re ji bo me cihê şanazî û serbilindiyê ye. Ji ber vê yekê, çiqas ew têkilî bihêztir bin, ewqas hevalbend û dostên me dikarin zêdetir hevkarî bikin bo man.

Xwişk û biraên hêja

Babetekî din ku îro ez hez dikim ji bo we pêşkêş bikim, mijara damezrandina Hikûmeta Herêma Kurdistanê ye. Ev meh dibe du sal ku ji ser hilbijartinên Herêma Kurdistanê derbas dibin. Mixabin, piştî du salan hîn ne parlament aktîf hatiye kirin û ne jî hikûmet hatiye damezrandin. Pir dirêj bûye; ev bi rastî tiştek nîne ku dilê me pê razî be. Em roja piştî hilbijartinê daxwaz kir ku parlament rûne û hikûmet bê damezrandin. Em her dem amade bûn û destê dostatiyê ji bo hemû wan aliyên siyasî dirêj kirine ku dengê gelê Kurdistanê wergirtine û endamên parlamentê ne, da ku werin hem parlament aktîf bikin û hem jî hikûmetê ava bikin. Damezrandina hikûmetê divê nîşandana encamên hilbijartinê be. Her çend em gelek amade bûn û niha jî amade ne, em ji mafê aliyên din jî zêdetir amade ne ku hêsankariyê bikin. Ji bo berjewendiya neteweya me û aşitî û ava bûna welatê me, em amade ne ku ji gelek mafên xwe berdin da ku hikûmet bê damezrandin. Tu sedem tune ye ku piştî du salan hîn parlament kar neke û aktîf nebe. Heke li ser vê bifikirin ku çima parlament aktîf nabe û çima hikûmet nayê damezrandin, hingê divê aliyekî berjewendî tê de hebe: ku bêyî berpirsiyar bûna li hember neteweya xwe û bêyî berpirsiyar bûna li hember tu hikûmetekê, hikûmranî bike. Dibe ku bixwaze ev rewş bi vî awayî bidome. Lê bi rastî neteweya me û gelê Kurdistanê divê êdî ji tu hêzeke siyasî qebûl neke ku bi çarenûsa neteweya me bilîze.

Endamên parlamentê nûnerên dengê gelê Kurdistanê ne. Berpirsiyariya her endamekî parlamentê ye ku li hemberî wê dengê ku gelê Kurdistanê daye, dilsoz be û îro li parlamentê rûne û ew dilsoziya ku li hember gelê xwe di parlamentê de heye, li daxwazên neteweya xwe biparêze. Em dixwazin parlament aktîf bibe, ji ber ku rûniştina parlamentê yekem gav e bo damezrandina hikûmetê. Daxwaza me ew e ku careke din berjewendiya neteweya me û berjewendiya welatê me li pêş berjewendiya partiyî û berjewendiya teng a kesane deynin, dev ji destkeftên kesane yên xwe berdin û li berjewendiyên welatê xwe û neteweya xwe bifikirin, destên xwe di nav destên me de bikin, parlamentê aktîf bikin û hikûmetê jî ava bikin. Ji ber ku sebra me jî sînorêk heye û em dixwazin bi neteweya xwe re rastgo bin, bi dengdêrên xwe re rastgo bin. Em dixwazin ew hikûmet di zûtirîn demê de bê damezrandin. Em jî amade ne ku ji bo wan aliyan ku xemxwarê wê gel û wê welatê ne hemû alîkariyê bikin, da ku em ber bi avabûna zêdetir û destkeftên zêdetir ve gav bavêjin.

Xwişk û biraên hêja:

Ez gelek dirêj kirim, lê min hez kir ku ev gotin di xizmeta we de bikim, ji ber ku hûn dikevin nav jiyaneke nû. Qonaxa xwendinê qediya û hûn ê li hemberî asteng û alîngariyan biçin, lê derfet jî gelek tên pêşiya we. Xwendin tenê ew nîne ku hûn pirtûkekê bixwînin an jî zanistekê fêr bibin. Dema hûn tên zanîngehê, hûn xwe amade dikin ka çawa dikarin rolekê hebin û bandora we li ser civaka we û neteweya we diyarker be. Em dixwazin Kurdistana me sal bi sal ber bi pêş ve biçe. Di asta xwendinê de em gavên baş avêtine. Desteya baweriyê ya di Encûmena Wezîran de bi biryara Encûmena Wezîranê hatiye damezrandin, ji bo ku asta xwendinê bi pîvan û standardekî navneteweyî pêş ve bibe. Ez dibînim ku encamên zanîngehên me sal bi sal çêtir dibin û perwerde li Herêma Kurdistanê ji asta seretayî heta zanîngehê ber bi pêş ve diçe, lê hîn li asta daxwaza me nîne. Hêvî û omîda me ew e ku Kurdistan tu carî di pêşketinê de nesekine, û ew pêşketin jî bi destê we pêk tê.

Careke din ez spas û destxweşiyê li we dikim, ev serkeftin li we hemûyan pîroz dikim. Hûn her tim serkeftî bin; îro û hemû rojên we bi destkeft û serkeftinê tijî bin, û Kurdistana me jî her tim ava be.