Odeya Bazirganî û Pîşesaziyê ya Hewlêrê di daxuyaniyekê de xemgîniya xwe ya kûr derbarê biryarên Hikûmeta Federal a Iraqê de derbirî ku bûne sedema bilindbûna nirxê dolarê û çêbûna bêîstiqrariyê di bazaran de, di heman demê de hişyarî da ku ev rewş rasterast zirarê dide debara jiyana welatiyan û sektora taybet.
Di daxuyaniya Odeya Bazirganî û Pîşesaziyê ya Hewlêrê de hatiye: "Ev cure biryarên aborî yên nehevseng, rasterast dibin sedema têkçûna hevsengiya bazarê, astengkirina tevgera bazirganiyê, bilindbûna nirxê mal û pêdiviyên bingehîn, her wiha girankirina barê jiyana welatiyan bi giştî û çîna kêm-dahat bi taybetî". Her wiha hat diyarkirin ku biryaran li pêşberî veberhêner û xwediyên şirketan astengiyên mezin di pêkanîna peymanan û planên xebatê yên wan de çêkirine.
Odeya Bazirganî û Pîşesaziyê ya Hewlêrê her wiha tekezî li ser wê kir ku çareserkirina krîzên aborî bi ferzkirina biryarên giran li ser milê sektora taybet û bazirganan pêk nayê, lê divê Hikûmeta Federal siyasetek darayî ya nermtir û zanistîtir bişopîne ku nirxa pere û îstiqrara bazarê biparêze.
Di dawiyê daxuyaniyê de, ji Hikûmeta Iraqê û aliyên têkildar hat xwestin ku di zûtirîn demê de van biryaran binirxînin ji bo kêmkirina barê li ser bazar û welatiyan, di heman demê de dubare kir ku wekî nûnerê sektora taybet dê berdewam bike di parastina maf û berjewendiyên bazirganan de li Herêma Kurdistanê.
