Di qezayeke giran a trafîkê de li ser riya Bedrîk - Elqoş, li sînorê parêzgeha Dihokê, sê endamên malbateke ji xelkê Rojavayê Kurdistanê (jin û mêr û kurê wan) jiyana xwe ji dest dan û sê kesên din jî birîndar bûn; ew ji bo beşdarbûna şahiyekê ji Hewlêrê ber bi Dihokê ve çûbûn.
Omêd Nizar, nûçegihanê Kurdistan TV, ragihand ku îro, sêşem, li ser riya sereke ya di navbera Bedrîk - Elqoşê de, li sînorê parêzgeha Dihokê, otomobîlek ji cureya (pikap Dêr) zivirî.
Li gorî agahiyan, di encama qezayê de sê endamên malbateke penaber ji xelkê Rojavayê Kurdistanê di cih de jiyana xwe ji dest dan. Malbat ji bav (70 salî), dayik (60 salî) û kurê wan (21 salî) pêk dihat.
Ev malbat ji bo beşdarbûna şahiyeke zewacê ji kampa "Dareşekeran" a bajarê Hewlêrê ber bi kampa "Domez" a Dihokê ve çûbûn.
Herwiha di vê qezayê de sê rêwiyên din ên di hundirê otomobîlê de birîndar bûn ku ji jinek û du zarokan pêk dihatin. Niha li nexweşxaneya rizgarkirina Dihokê tedawiya bijîşkî werdigirin.
