Piştî 5 rojan ji wendabûna wê li devera "Nehlê" ya girêdayî navçeya Akrê, keçeke ciwan bi navê Şîrîn Yasin bi saxî hat dîtin û ji ber neîstiqrara rewşa tenduristiyê, yekser hat şandin nexweşxaneyê.
Şîrîn Yasin, 24 salî, ku xwediyê pêdiviyên taybet e (nikare biaxive û bibihîze), li çemê di navbera her du gundên "Keşkeva" û "Bakirman" de ji aliyê welatiyên herêmê ve hat dîtin.
Navborî pênc rojan berê ji malê derketibû û winda bûbû; di vê demê de jî sedan kes ji gelê devera Nehlê, bi alîkariya aliyên têkildar, kampanyayeke berfireh a lêgerîn û kontrolê pêk anîn, heta ku di dawiyê de karîbûn wê bibînin.
Ji ber ku di dema dîtina wê de rewşa tenduristiyê neîstiqrar bû, bi lez ber bi nexweşxaneya "Gulan" a Akrê ve hate şandin, ji bo ku dermankirina bijîjkî ya pêwîst bistîne.
Divê bê gotin ku ev cara duyemîn e ku navborî winda dibe. Nêzîkî mehê berê jî ji bo 3 rojan li ser sînorê devera "Zêbar" bêserûber bûbû; piştî ku hat dîtin, li nexweşxaneya "Blê" hate dermankirin.
