بەفەرمانی دەستەی دەستپاكی عێراق، ئەمڕۆ دووشەممە هێزە ئەمنییەكان هەڵیان كوتایە سەر ماڵی برای پەرلەمانتارێكی پێشووی عێراق و بەتۆمەتی ساختەكردن و گەندەڵییەوە دەستگیریان كرد.
ئەو كەسەی دەستگیركراوە برای داود عێدان ئەندامی پێشووی ئەنجوومەنی نوێنەرانی عێراقە و لە ماڵەكەی خۆیدا لە پارێزگای زیقاڕ دەستگیركراوە.
لە كاتی دەستگیركردنی تۆمەتبار لەنێو ماڵەكەیدا دەستبەسەر دەیان مامەڵەی زەویوزار و چەكی دارایی و نووسراوی ساختەی شارەوانی گیراوە.
بەپێی زانیارییەكان تۆمەتبارەكە بە پێی ماددەی 340 لە یاسای سزادانی عێراق دەستگیر كراوە كە تایبەتە بە گەندەڵی و فێڵ و ساختەكردنی مامەڵە و نووسراوی حكوومەت.
دەستەی دەستپاكی عێراق هەفتەی رابردوو ئاشكراكردنی تۆڕێكی گەندەڵی و ساختەكردنی نووسراوی حكوومەتی لە بەڕێوەبەرایەتی شارەوانی ناسڕییە سەنتەری پارێزگای زیقاڕی راگەیاند، ناوی بەڕێوەبەری پێشووی شارەوانییەكە و چەند فەرمانبەرێك لەنێو تۆڕەكەدا هەبوو.
