وەزارەتی کاروباری دەرەوەی قەتەر ڕایگەیاند ئێران دەبێت نیازی باش پیشان بدات و هەڕەشەکانی بەرامبەر وڵاتانی کەناری کەنداو بوەستێنێت، بۆ ئەوەی هەوڵەکانی ناوبژیوانی بۆ کەمکردنەوەی ئاڵۆزییەکان و گەیشتن بە چارەسەرێکی ئاشتییانە بۆ قەیرانی نێوان ئەمریکا و ئێران بە ئەنجام بگات.
سێشەممە، ۲۷ ئۆکتۆبەر ۲۰۲۶، ئیبراهیم هاشمی، بەڕێوەبەری بەشی ئاگادارکردنەوە و پەیوەندییە گشتییەکانی وەزارەتی کاروباری دەرەوەی قەتەر، لە کۆنفرانسێکی ڕۆژنامەوانی لە دوحە وتی: «ئێران دەبێت نیازی باشی خۆی بسەلمێنێت و هەڕەشەکان بەرامبەر وڵاتانی کەناری کەنداو بوەستێنێت، بۆ ئەوەی هەوڵەکانی ناوبژیوانی بۆ کەمکردنەوەی ئاڵۆزییەکان لە ناوچەکە سەرکەوتوو بن.»
بەڕێوەبەری ئاگادارکردنەوەی وەزارەتی کاروباری دەرەوەی قەتەر ڕوونی کردەوە کە ئەم ناوبژیوانییەکان بۆ کەمکردنەوەی ئاڵۆزییەکان و خۆشکردنی ڕێگا بۆ کۆتاییهێنان بە قەیرانی نێوان ئەمریکا و ئێران لە ڕێگەی چارەسەرە ئاشتییانەکانەوە ئەنجام دەدرێن. ئەویش زیادیکرد: «هەوڵەکانی عەرەبستانی سعودی و وڵاتانی پەیمانی مەککە تەواوکەری هەنگاوەکانی قەتەر و پاکستانن. هەروەها سەفەری دەستەیەکی قەتەری بۆ تاران بە مەبەستی پشتگیریکردن لە ناوبژیوانی بۆ چارەسەرکردنی قەیرانی ئێستا ئەنجام دراوە؛ لە هەمان کاتدا، ناوچەکە پێویستی بە سیستەمێکی نوێی ئاسایشی ناوچەیی هەیە کە ڕێز لە سەروەریی وڵاتان بگرێت.»
دووشەممە ۲۶ ئۆکتۆبەر ۲۰۲۶، وڵاتانی «پەیمانی مەککە» لە تاران لەگەڵ بەرپرسانی باڵای ئێران گفتوگۆیان کرد. لە هەمان کاتدا، ئەمڕۆ سێشەممە لە مۆسکۆ و لە کەناری هەشتەمین کۆبوونەوەی «کۆمەڵەی وڵاتانی هەناردەکەری گاز»، تەمیم بن حەمەد ئال سانی، ئەمیری قەتەر، لەگەڵ مەسعود پزیشکیان، سەرۆککۆماری ئێران، دیداری کرد و دەربارەی پەڕەی گفتوگۆکان لەگەڵ ئەمریکا، تەنگەی هۆرموز و دابینکردنی وزە گفتوگۆیان کرد.
