ئەمریکا لە ڕێگەی سەپاندنی زنجیرەیەک سزای نوێوە، دەمارە داراییەکانی موجتەبا خامنەیی و تۆڕە نهێنییەکانی گواستنەوەی دراوی لە ئێران کردە ئامانج.
وەزارەتی خەزێنەی ئەمریکا لە هەنگاوێکی نوێدا بۆ وشککردنی سەرچاوە داراییەکانی سەرکردایەتیی ئێران، سزای بەسەر "عەلی ئەنساری"دا سەپاند، کە بە یەکێک لە دیارترین و کاریگەرترین ناوەندگیرە داراییەکانی ڕژێمی ئێران و "دابینکاری دارایی" (Financier)ی موجتەبا خامنەیی، کوڕی عەلی خامنەیی دەناسرێت. ئەم بڕیارە لە کاتێکدایە کە واشنتن فشارەکانی بۆ سەر هەرەمی دەسەڵات لە تاران چڕتر کردووەتەوە، بەتایبەت دوای ئەو ئاڵۆزییە سەربازی و هەواڵگرییانەی کە لە چەند مانگی ڕابردوودا ناوچەکەی گرتووەتەوە.
بەپێی زانیارییەکانی وەزارەتی خەزێنە، عەلی ئەنساری بەرپرسیار بووە لە بەڕێوەبردن و سەرپەرشتیکردنی تۆڕێکی جیهانیی یەکجار بەرفراوان لە سەروەت، سامان و وەبەرهێنانە جۆراوجۆرەکان. ئەم تۆڕە داراییە بە شێوەیەکی سەرەکی بۆ بەرژەوەندیی موجتەبا خامنەیی و ژمارەیەک لە بەرپرسە باڵاکانی سوپای پاسداران و دامەزراوە هەستیارەکانی ئێران کاری کردووە. ئەنساری توانیویەتی لە ڕێگەی ئەم تۆڕەوە، ملیۆنان دۆلار بۆ ناوخۆ و دەرەوەی ئێران بگوازێتەوە و وەبەرهێنانی گەورە لە کەرتە جیاوازەکاندا بکات بۆ دابینکردنی بودجەی چالاکییە سیاسی و ئەمنییەکانی ڕێبەری نوێی ئەگەر و بازنەی نزیک لە دەسەڵات.
جگە لە عەلی ئەنساری، سزاکانی ئەمریکا ژمارەیەک کۆمپانیای گەورەی ئاڵوگۆڕی دراو (صرافة)ی ئێرانیی گرتووەتەوە کە وەک "سیستەمێکی بانکیی سێبەر" کاریان کردووە. ئەم کۆمپانیایانە ڕۆڵێکی سەرەکییان هەبووە لە گواستنەوەی ملیاران دۆلار بە شێوەیەکی ساڵانە بۆ بەرژەوەندیی ئەو بانکە ئێرانییانەی کە پێشتر لە لایەن ئەمریکاوە سزایان بەسەردا سەپێنرابوو. ئەم تۆڕە نهێنییە وەک ڕێڕەوێکی سەرەکی بۆ دەور لێدانەوەی سزاکان بەکارهێنراوە و واشنتن دەیەوێت بەم هەنگاوە ڕێگە لە هاتوچۆی ئەو پارە زەبەلاحانە بگرێت کە دەبنە هۆی بەهێزکردنی توانای سەربازی و ئەمنیی تاران.
سەپاندنی ئەم سزایانە لە کاتێکدایە کە ئابووریی ئێران بەدەست قەیرانێکی قووڵی دارایی و دابەزینی بەهای تمەنەوە دەناڵێنێت. پەکخستنی تۆڕە نهێنییەکانی ئاڵوگۆڕی دراو، گوشارێکی زیاتر دەخاتە سەر حکومەت بۆ دابینکردنی دراوی بیانی و ڕەنگە ببێتە هۆی شەپۆلێکی نوێی گرانی لە ناوخۆی وڵاتدا. تائێستا تاران بە فەرمی کاردانەوەی بەرامبەر ئەم سزایانە نیشان نەداوە، بەڵام پێدەچێت ئەم هەنگاوەی واشنتن بخرێتە سەر لیستی ئەو "پێشێلکارییانە"ی کە عەباس عێراقچی، وەزیری دەرەوەی ئێران، ئەمریکای پێ تۆمەتبار دەکات لە ڕێککەوتنی لێکتێگەیشتندا.
