نێوەندگیرە قەتەری و پاکستانییەکان ڕایانگەیاند، ئەمریکا و ئێران کۆتاییان بە خولی یەکەمی دانوستانەکانیان هێنا، ئەمەش دوای دانوستانێک کە تا بەرەبەیانی ڕۆژی دووشەممە بەردەوام بوو و هەردوولا لەسەر نەخشەڕێگەیەک ڕێککەوتن کە ئامانج لێی گەیشتنە بە ڕێککەوتنێکی کۆتایی لە ماوەی 60 ڕۆژدا.
لە ڕاگەیەندراوێکی هاوبەشدا کە لەلایەن قەتەر و پاکستانەوە بڵاو کراوەتەوە، تێیدا هاتووە، ئەمریکا و ئێران ڕێککەوتوون لەسەر درێژەدان بە دانوستانە تەکنیکییەکان بە درێژاییی ئەم هەفتەیە لە لە هاوینەهەواری (بێرگنستۆک) لە سویسرا، هاوکات گەیشتوونەتە میکانیزمێک کە ئامانج لێی کۆتاییهێنانە بە شەڕ لە لوبنان و کردنەوەی کەناڵێکی پەیوەندییە بۆ زامنکردنی تێپەڕبوونی سەلامەتیی کەشتییە بازرگانییەکان بە گەرووی هورمزدا.
لە ڕاگەیەندراوەکەدا هاتووە، کارەکانی ڕۆژی یەکەمی لوتکەکە، کەشێکی ئەرێنی و بونیاتنەری بەخۆیەوە بینیوە.
لەلایەکی دیکەوە، عەباس عێراقچی، وەزیری دەرەوەی ئێران لە پلاتفۆرمی (ئێکس)، نووسیویەتی: "نێوەندگیرییە بەردەوامەکەی پاکستان و قەتەر، پێشکەوتنێکی گەورەی بۆ کۆتاییهێنان بە جەنگی لوبنان بەدەستهێناوە."، هەروەها ئاماژەی بەوەش کردووە، وڵاتەکەی لێخۆشبوونی بەدەستهێناوە کە ڕێگە بە بەردەوامبوونی هەناردەی نەوت و بەرهەمە پترۆکیمیاییەکانی ئێران دەدات، سەرباری ئازادکردنی بەشێک لە سامانە سڕکراوەکانی ئێران و ڕاگەیاندنی پلانێکی گەورە بۆ ئاوەدانکردنەوە و گەشەپێدانی ئابووریی ئێران.
لە بەرامبەردا، کۆشکی سپی تاوەکو ئێستا هیچ لێدوانێکی ڕاستەوخۆی سەبارەت بە کۆتاییهاتنی ئەم خولەی ئێستای دانوستانەکان یان ئەنجامە کۆتاییەکانی نەداوە.
