ئەنجوومەنی ئاشتی کە لەلایەن دۆناڵد ترەمپ سەرۆکی ئەمریکاوە دامەزرێندراوە، ڕایگەیاند کە پێویستە ئەو لێژنە فەڵەستینییەی بەرپرسە لە بەڕێوەبردنی غەززە، سەرپەرشتی تەواوی چەکەکان لە ناو کەرتەکەدا بکات. ئەم هەڵوێستەی ئەنجوومەنەکە دوای ئەوە دێت کە بزووتنەوەی حەماس بە فەرمی هەڵوەشاندنەوەی حکوومەتەکەی لە کەرتی غەززە ڕاگەیاند.
ئەنجوومەنەکە لە بەیاننامەیەکدا کە لە پلاتفۆرمی کۆمەڵایەتی (ئێكس) بڵاوی کردووەتەوە، ئاماژەی بەوە کردووە کە بنەمای سەرەکی بۆ قۆناغی داهاتوو بریتییە لە هەبوونی "یەک دەسەڵات، یەک یاسا و یەک چەک". بەپێی بەیاننامەکە، ئەم بنەمایە وا دەخوازێت کە سەرجەم چەکەکان لەژێر کۆنترۆڵی لێژنەی نیشتمانی بۆ بەڕێوەبردنی غەززەدا بن، کە ئەو لێژنەیە لە دوای ڕێککەوتنی ئاگربەست لە تشرینی یەکەمی ساڵی 2025دا پێکهێنراوە.
ئەم هەنگاوە وەک بەشێک لە هەوڵەکان بۆ یەکخستنی دامەزراوە ئەمنییەکان و سەقامگیرکردنی دۆخی کەرتی غەززە لە قۆناغی دوای شەڕدا دەبینرێت، بە ئامانجی ئەوەی تەنها یەک لایەنی فەرمی و نیشتمانی بەرپرسیارێتی پاراستنی ئاسایشی ناوچەکەی لە ئەستۆدا بێت.
