کەناڵی (ئێران ئینتەرناشناڵ) لە ڕاپۆرتێکی نوێدا ئاشکرای کرد، کە مەسعوود بزشکیان سەرۆک کۆماری ئێران، دیدارێکی یەکجار نهێنی لەگەڵ موجتەبا خامنەیی کوڕی ڕێبەری باڵای ئێران ئەنجامداوە، بە مەبەستی تاوتوێکردنی پرسە هەستیارەکانی دەسەڵات.
بەپێی زانیارییەکانی ئەم کەناڵە، کۆبوونەوەکە لەسەر کورسی دواوەی ئۆتۆمبێلێک و لە شوێنێکی نادیار و دوور لە چاوی کامێراکان بەڕێوەچووە تاوەکو ئەوپەڕی نهێنیپارێزی بپارێزرێت. لە هەمانکاتدا ئاماژە بەوە کراوە کە ئەو وێنەیەی لە تۆڕە کۆمەڵایەتییەکان و هەندێک ناوەندی میدیایی وەک بەڵگەی ئەو دیدارە بڵاوکراوەتەوە، ڕاستەقینە نییە و لە ڕێگەی تەکنەلۆژیای ژیریی دەستکرد (AI) دروست کراوە.
ئەم هەواڵە لە کاتێکدایە کە پرسی جێنشینی لەناو هەڕەمی دەسەڵاتی تاراندا بووەتە گەرمترین تەوەری باس و خواستە سیاسییەکان. تەنها ماوەیەکی کەمە ئەنجوومەنی شارەزایانی ئێران داوای لە بەرپرسان کردووە کە بە تەواوەتی پابەندی ڕێنماییەکانی موجتەبا خامنەیی بن، ئەمەش متمانەی زیاتر دەداتە ئەو دەنگۆیانەی کە باس لە بەهێزبوونی پێگەی کوڕەکەی عەلی خامنەیی دەکەن لە بڕیارە چارەنووسسازەکاندا.
چاودێرانی سیاسی پێیانوایە، بڵاوبوونەوەی هەواڵی ئەم دیدارە و هاوکات بەکارهێنانی وێنەی دروستکراو بە ژیریی دەستکرد، ئاماژەیە بۆ ئاستی ئاڵۆزیی ململانێ نێوخۆییەکان و ئەو جەنگە دەروونییەی کە لە ئێستادا لە دەوری داهاتووی ڕژێمی ئێران دەخولێتەوە. بەکارهێنانی کورسی پاشەوەی ئۆتۆمبێل وەک شوێنی دیدار، گوزارشتە لەو ترس و وریاییە زۆرەی کە سەرکردەکان لەم قۆناغە هەستیارەدا پەیڕەوی دەکەن.
تاوەکو ئێستا نووسینگەی سەرۆک کۆمار یان دامەزراوە فەرمییەکانی ئێران هیچ وەڵامێکیان بۆ ئەم ڕاپۆرتەی ئێران ئینتەرناشناڵ نەبووە.
