میدیاکانی ئێران بڵاویان کردەوە کە پاش زنجیرەیەک گفتوگۆی چڕی تەکنیکی و دیپلۆماسی لە نێوان تاران و مەسقەت، هەردوولا لە کۆتایی مانگی ئاب و سەرەتای مانگی ئەیلولی 2026 گەیشتوونەتە ڕێککەوتنێکی کۆتایی لەبارەی هاتوچۆ لە گەرووی هورمزدا.
بەپێی زانیارییەکان، بڕیارە بەم نزیکانە وردەکارییەکانی ئەم تێگەیشتنە بە ئامادەبوونی وەزیرانی دەرەوەی وڵاتانی کەناراوەکانی کەنداو و عێراق ڕابگەیەنرێت. سەرچاوەکە جەختی کردەوە کە ڕێککەوتنەکە تایبەتە بە ئێران و عومان و بەشداریکردنی وڵاتانی دیکە تەنها بۆ ئاگادارکردنەوەیانە لە وردەکارییەکان، بۆ ئەوەی بە شێوەیەکی ضمنی کۆمەڵگەی نێودەوڵەتی ڕەزامەندی خۆی دەرببڕێت.
وردەکاریی ڕێککەوتنەکە:
هەموو ڕێڕەوی چوونە ژوورەوە بۆ کەنداو و بەشێک لە ڕێڕەوی دەرچوون، دەکەوێتە ناو سنووری ئاوە هەرێمییەکانی ئێرانەوە.
هاتوچۆی کەشتییەکان لەمەودوا بەپێی ڕێکار و ڕێکخستنە ئێرانییەکان دەبێت.
دوای دەستپێکردنی ڕێڕەوە نوێیەکە، ڕێڕەوی باشوور کە ئەمریکا جەختی لەسەر کردنەوەی دەکردەوە، بە یەکجاری دادەخرێت.
ئێران: کردنەوەی گەرووەکە بەستراوەتەوە بە 7 مەرجەوە
میدیاکانی ئێران لە زاری سەرچاوەیەکەوە ڕایانگەیاند: "ئەم تێگەیشتنە بە هیچ جۆرێک بە مانای کردنەوەی گەرووی هورمز نییە". ئاماژەی بەوەش کرد کە ئێران لە ڕێگەی نێوەندگییرانەوە 7 مەرجی بۆ ئەمریکا دیاری کردووە و تا ئەو مەرجانە جێبەجێ نەکرێن، گەرووەکە بە داخراوی دەمێنێتەوە.
لە کۆتاییدا جەخت کرایەوە، ئەگەر بڕیاری کردنەوەی گەرووەکە بدرێت، تەنها لە چوارچێوەی ئەم ڕێککەوتنە نوێیەی نێوان ئێران و عوماندایە و ئەمەش بە هەنگاوێکی گرنگ بۆ سەلماندنی سەروەریی ئێران بەسەر گەرووەکەدا دادەنرێت.
