ڕەجەب تەیب ئەردۆغان، سەرۆک کۆماری تورکیا، لە پەیوەندییەکی تەلەفۆنیدا لەگەڵ دۆناڵد ترەمپ، سەرۆکی ئەمریکا، داوای لێکرد کە هەوڵە دیپلۆماسییەکان لەگەڵ ئێران بۆ هێورکردنەوەی بارگرژییەکان چڕتر بکەنەوە. سەرۆکایەتیی تورکیا، ڕۆژی سێشەممە (18ی ئابی 2026)، ڕایگەیاند کە ئەنقەرە ئامادەی هەموو جۆرە پشتگیرییەکە بۆ سەرخستنی پڕۆسەی ئاشتی لە ناوچەکەدا.
بەپێی بەیاننامە فەرمییەکە، ئەردۆغان جەختی لە گرنگیی بەکارهێنانی "وپەڕی دیپلۆماسی" کردووەتەوە تاوەکو ڕێگری لە پەرەسەندنی ململانێ سەربازییەکان بگیرێت. ئەم پەیوەندییە دوای ئەوە دێت کە ئێران هەڕەشەی گۆڕینی ستراتیژیی خۆی کرد بۆ "وپەڕی هێرشبەری"، بەهۆی بنبەستبوونی دانوستانەکان و ڕەتکردنەوەی درێژکردنەوەی ئاگربەست لە لایەن واشنتنەوە. هەروەها پڕۆسەی دووبارە کردنەوەی گەرووی هورمز بۆ کەشتییە نەوتەکێشەکان دووچاری پەککەوتن بووەتەوه.
لە بەشێکی دیکەی گفتوگۆکەدا، هەردوو سەرۆک باسیان لە پەیوەندییە دوولایەنەکان، جەنگی غەززە، و ئەو ڕێککەوتننامە بەرگرییە کرد کە لە نێوان تورکیا، سعوودیە و پاکستاندا واژۆ کراوە. ئەردۆغان ستایشی ئەم هاوپەیمانییە سێقۆڵییەی کرد و وەک "هەڵوێستێکی بەهێز" بۆ پاراستنی ئاسایش و سەقامگیریی ناوچەکە وەسفی کرد.
هەروەها سەرۆکی تورکیا نیگەرانیی خۆی گەیاندە ترەمپ سەبارەت بە زیادبوونی هێرشەکانی ئیسرائیل بۆ سەر فەلەستینییەکان، لە کاتێکدا کە دەبوو قۆناغی دووەمی "پلانی ئاشتیی غەززە"ی ترەمپ بکەوێتە بواری جێبەجێکردنەوە. تاوەکو ئێستا کۆشکی سپی هیچ کۆمێنتێکی فەرمیی لەسەر ناوەڕۆکی ئەم پەیوەندییە تەلەفۆنییە بڵاونەکردووەتەوە.
