تۆڕی هەواڵی «ئاکسیۆس»ی ئەمریکا بە پشتبەستن بە چەند سەرچاوەیەکی ئاگادار ئاشکرای کردووە کە پیت هەگسێت، وەزیری جەنگی ئەمریکا، لە کاتی گەشتێکی ڕانەگەیەنراو و نهێنی بۆ ئیسرائیل، لەگەڵ بنیامین نەتانیاهو، سەرۆکوەزیرانی ئەو وڵاتە، دیداری کردووە.
بەپێی زانیارییەکانی ئەم تۆڕە، ئەم کۆبوونەوەیە لە بنکەی ئاسمانی «عوەدا» لە باشووری ئیسرائیل بەڕێوەچووە؛ بنکەیەک کە فڕۆکە جەنگییەکان و فڕۆکەکانی گواستنەوەی سووتەمەنیی هێزە ئەمریکییەکان لەوێ جێگیرکراون. ئەم گەشتە هەستیارە تەنها هەشت ڕۆژ پێش هەڵبژاردنی گشتیی ئیسرائیل ئەنجام دەدرێت و هاوکاتە لەگەڵ گفتوگۆ و هەماهەنگییە چڕەکان لەنێوان واشنگتن و تەل‌ئەبیب سەبارەت بە ئەگەری دەستپێکردنەوەی ئۆپەراسیۆنە سەربازییە فراوانەکان دژی ئێران.
هەروەها ئاماژە کراوە کە وەزیری جەنگی ئەمریکا لە کاتی ئەم گەشتەدا لەگەڵ سەربازانی وڵاتەکەی لە ناوچەی فەرماندەیی ناوەندیی ئەمریکا (سێنتکام) دیداری کردووە. لە هەمان کاتدا، ئەم هەنگاوە دوای ئەوە ڕوویداوە کە دونالد ترامپ، سەرۆکی ئەمریکا، بە فەرمی پشتگیریی خۆی بۆ سەرکەوتنی نەتانیاهو لە هەڵبژاردنی داهاتوو دووپات کردەوە؛ ئەمە بە ڕوونی نیشانەی بەهێزیی هەماهەنگییە ئەمنییە و سەربازییەکان لەنێوان ئەم دوو هاوپەیمانە لەم قۆناغە هەستیارەدا.
