بەرپرسانی ئەمریکا ئاگادارییەکی دەستبەجێ و بەرفراوانی ئەمنیی بۆ هەموو هاووڵاتییەکانی خۆی لە وڵاتانی ڕۆژهەڵاتی ناوەڕاست — لەوانە عەرەبستانی سعودی، قەتەر، ئیمارات و ئیسرائیل — دەربارەی زیادبوونی مەترسی «دەستدرێژی و چاڵاکییە ناوچەییەکان» بەهۆی بەردەوامبوون و توندبوونەوەی هێرشەکانی گرووپی حوسییەکان بڵاوکردەوە.
ئاگادارییە فەرمییەکان لە ماڵپەڕی باڵیۆزخانەکانی ئەمریکا لە ۱۱ وڵاتی ناوچەکە بڵاوکراونەتەوە، کە بریتین لە: ئیمارات، یەمەن، عەرەبستانی سعودی، قەتەر، عومان، لوبنان، کوێت، ئوردن، ئیسرائیل، عێراق و بەحرەین. هەرچەندە ئاستی گشتیی ئاگادارییەکان نەگۆڕاوە، بەڵام هاوکاتیی ئەم پەیامانە لەم وڵاتانەدا نیشانەی نیگەرانییەکی قووڵی ئەمنییە لە فراوانبوونی مەودای ملمێلانێ سەربازییەکان.
لە بیرووت، باڵیۆزخانەی ئەمریکا جارێکی دیکە داوای لە هاووڵاتییەکانی خۆی کرد بەهۆی هەڕەشە ناوچەییە پەیوەندیدارەکان بە حوسییەکانەوە سەردانی لوبنان نەکەن؛ لە هەمان کاتدا، ناوچەکانی «ضاحیه» و «باشووری بیرووت»ی بەهۆی مەترسی ڕفاندن، تەقینەوەی تەقەمەنییە تەقینەونەکراوەکان و ئەگەری ڕوودانی پێکدادانی چەکداریی ڕاستەوخۆ، وەک «ناوچەی زۆر مەترسیدار» دیاری کرد. لەگەڵ ئەم ئاگادارییە دیپڵۆماسییەکاندا، گۆڕانکارییە سەربازییە مەیدانییەکانیش دەستیان پێکردووە؛ تۆڕی هەواڵی «ئێن‌بی‌سی» (NBC) ئاشکرای کرد کە واشنتن دەستیکردووە بە دەرکردنی بەشێک لە هێزەکانی لە بنکە سەربازییەکان لە ئوردن، قەتەر و کوێت.
لە لایەکی دیکەوە، وەزارەتی کاروباری دەرەوەی ئەمریکا بە بەشێک لە دیپلۆماتەکانی خۆی و ئەندامانی خێزانەکانیان فەرمانی دا خاکی عەرەبستانی سعودی بەجێبهێڵن. ئەم هەنگاوە دوای زنجیرەیەک هێرشێک ئەنجام درا کە بە تازەیی بۆ سەر خاکی ئەم وڵاتە کراون.
