ژەنراڵ ئیال زامیر، سەرۆکی ئەرکانی سوپای ئیسرائیل، بڕیاری دا بە ناردنی هێزی سەربازیی زیاتر بۆ ناوچەی نابلوس لە کەناری ڕۆژئاوا، ئەمەش دوای ئەنجامدانی هێرشێک لە نزیک گوندی "تەل" کە سوپای ئیسرائیل وەک "کردەوەیەکی تیرۆریستیی مەترسیدار" وەسفی کردووە.
ئەمڕۆ هەینی (24ی تەممووزی 2026)، سەرۆکی ئەرکانی سوپا بە هاوڕێیەتی فەرماندەی ناوچەی ناوەڕاست و بەڕێوەبەری بەشی ئۆپەراسیۆنەکان، هەڵسەنگاندنێکی مەیدانییان بۆ بارودۆخی ئەمنیی ناوچەی نابلوس ئەنجامدا. لە میانی کۆبوونەوەکەدا، زامیر فەرمانی دا کە "بەهێزکردنێکی بەرفراوان" بۆ یەکە سەربازییەکان لەو سنوورەدا ئەنجام بدرێت بە مەبەستی پتەوکردنی هێڵەکانی بەرگری.
سەرۆکی ئەرکانی سوپای ئیسرائیل جەختی کردەوە کە دەبێت سەرجەم ئەو کەسانەی لە پشت هێرشەکەی گوندی "تەل"ەوە بوون، دەستنیشان بکرێن و دەستگیر بکرێن. ئەم بڕیارە دوای ئەوە دێت کە ناوچەکە لە چەند کاتژمێری ڕابردوودا شاهیدی گرژیی ئەمنی و پێکدادان بووە.
هاوکات سوپای ئیسرائیل ڕایگەیاند کە هێزەکانیان بەردەوامن لە ئۆپەراسیۆنە سەربازییەکانیان لە ناوچەی "سامیرە" (کەناری ڕۆژئاوا)، بە تایبەتی لە گوندی "بێت فوریک" و شاری "توباس". ئاماژە بەوەش دراوە کە ئەم هەڵمەتە سەربازییە لە ئێوارەی ڕۆژی پێنجشەممەوە بە شێوەیەکی بەرفراوان دەستی پێکردووە بە مەبەستی پوچەڵکردنەوەی ئەو هەڕەشانەی کە ڕووبەڕووی ئاسایشی ناوچەکە دەبنەوە.
ئەم پەرەسەندنە نوێیانە لە کەناری ڕۆژئاوا لە کاتێکدایە کە ناوچەی ڕۆژهەڵاتی ناوەڕاست بە گشتی لەژێر بارگرژییەکی توندی سەربازیدایە و ئامادەباشیی هێزە ئەمنییەکانی ئیسرائیل بۆ بەرزترین ئاست بەرز کراوەتەوە.
