بەریتانیا بە ڕەسمی پێشوازی لە بڕیاری تێکەڵکردنەوەی هێزەکانی سوریای دیموکرات (هەسەدە) وەک هێزێکی سەربازیی سەربەخۆ و تێکەڵبوونیان لە ناو دامەزراوەکانی دەوڵەتی سووریادا کرد. ئەم هەڵوێستەی لەندەن دوای ڕاگەیاندنی یەکگرتنی پێکهاتە سەربازی و کارگێڕییەکانی باکوور و ڕۆژهەڵاتی سوریا دێت لە چوارچێوەی دەوڵەتی یەکگرتووی سوریادا.
باری بیچ، نێردەی تایبەتی بەریتانیا بۆ سووریا بە وەکالەت، لە ڕاگەیەندراوێکدا ئاماژەی بەوە کرد کە یەکگرتنی "هەسەدە" و ئیدارەی خۆسەری باکوور و ڕۆژهەڵاتی سوریا لە ناو دامەزراوە نیشتمانییەکاندا، هەنگاوێکی مێژوویی و گرنگە بەرەو بونیادنانی سوریایەکی یەکگرتوو. ناوبراو جەختی کردەوە کە ئەم پڕۆسەیە دەبێتە هەوێنی چەسپاندنی ئاشتی و سەقامگیری بۆ هەموو پێکهاتەکانی وڵاتەکە و هیوای خواست ئەم گۆڕانکارییانە کۆتایی بە ئاڵۆزییە چەندین ساڵەکان بهێنن.
هێزەکانی سوریای دیموکرات (هەسەدە) کە زۆرینەی لە شەڕڤانانی کورد پێکهاتبوو، بۆ چەندین ساڵ هاوپەیمانی سەرەکیی هاوپەیمانی نێودەوڵەتی بوون لە شەڕی دژی داعش و توانییان ناوچەیەکی فراوان لە ژێر دەسەڵاتی ئەو گرووپە دەربهێنن. پڕۆسەی تێکەڵکردنەوەی ئەم هێزە وەک قەوارەیەکی سەربەخۆ و چوونە ناو سوپای نیشتمانی، دوای گۆڕانکارییە سیاسییە کتوپڕەکانی دیمەشق دێت، کە تێیدا هەوڵ دەدرێت سیستمێکی نوێی حوکمڕانیی یەکگرتوو بونیاد بنرێتەوە. جیهان بە بایەخەوە سەیری ئەم پەرەسەندنە دەکات وەک هەوڵێک بۆ کۆتاییهێنان بە دابەشبوونی خاکی سووریا و گەڕانەوەی دامەزراوەکان بۆ ژێر چەتری حكوومەتێکی ناوەندیی نوێ.
