لیژنەی باری نائاسایی و بەڕێوەبردنی کارەساتەکان لە پارێزگای دێرەزوور، فەرمانی چۆڵکردنی دەستبەجێی بۆ دانیشتووانی ناوچەکانی "حەویجە سەکر" و "حەویجە کاتع" دەرکرد، ئەمەش دوای بەرزبوونەوەی مەترسیداری ئاستی ئاوی ڕووباری فورات کە هەڕەشەی کارەساتێکی مرۆیی لێدەکرێت.
بەپێی زانیارییە فەرمییەکان، بەرزبوونەوەی ئاستی ئاوەکە دەرەنجامی کردنەوەی بەنداوەکانە لە سووریا و تورکیا، دوای ئەوەی بەهۆی بارانبارینی زۆری ئەم وەرزەوە کۆگاکانی ئاو بە تەواوی پڕ بوون و بۆ کەمکردنەوەی فشار لەسەر بەنداوەکان، بڕێکی زۆر ئاو بەردرایەوە.
لیژنەی باری نائاسایی داوای لە هاووڵاتیان کردووە بە خێرایی ناوچە مەترسیدارەکان جێبهێڵن و هاوکاری تەواوی تیمەکانی فریاگوزاری و لایەنە پەیوەندیدارەکان بن، هەروەها جەختیان لە پابەندبوون بە ڕێنماییەکان کردووەتەوە بۆ پاراستنی گیانی دانیشتووان و دوورکەوتنەوە لە هەر زیانێکی مرۆیی.
لە ئێستادا ناوچەکانی دەوروبەری ڕووباری فورات لە دۆخی ئامادەباشی باڵادان و چاودێری مەیدانی چڕ دەکرێت، لەبەر مەترسی فراوانبوونی ڕووبەری ئاوەکە و گەیشتنی بە گەڕەکە نیشتەجێبوونەکان و زەوییە کشتوکاڵییە نزمەکان، بەتایبەت کە پێشبینی دەکرێت لە کاتژمێرەکانی داهاتوودا لێشاوی زیاتری ئاو بگاتە ناوچەکە.
تیمەکانی وەڵامدانەوەی خێرا سەرقاڵی گواستنەوەی خێزانەکان و دابینکردنی پێداویستییەکانن، هاوکات ڕێوشوێنی خۆپارێزی بۆ پاراستنی ژێرخانی ناوچەکە گیراوەتە بەر.
