سەرۆکایەتیی دادگای تێهەڵچوونەوەی زیقار، دەستگیرکردنی ژمارەیەک فەرمانبەری شارەوانیی ناسریە و چەند "مامەڵەکارێکی" ڕاگەیاند کە دەستیان لە ساختەکردنی مۆر و بەڵگەنامەکانی پەیوەست بە دابەشکردنی زەوی هەبووە.
ئەنجوومەنی باڵای دادوەریی عێراق ڕایگەیاند: لە ئۆپەراسیۆنێکی هاوبەشدا، هێزەکانی نووسینگەی لێکۆڵینەوەی دەستپاکی بە هەماهەنگی لەگەڵ بەڕێوەبەرایەتیی هەواڵگریی پارێزگای زیقار، توانییان چەند فەرمانبەرێکی شارەوانی و چەند کەسێکی تر کە وەک مامەڵەکار (معقب) کاریان کردووە، دەستگیربکەن.
بەپێی ڕاگەیەندراوەکە، لە کاتی دەستگیرکردنی تۆمەتبارەکاندا، دەست بەسەر چەندین مۆر، نووسراوی فەرمی و کۆنووسی ساختەی پەیوەست بە پارچە زەویی نیشتەجێبووندا گیراوە. هەروەها تۆمەتباران بریکارنامە و مستەمسەکی ساختەیان بەکارهێناوە بۆ ڕاییکردنی مامەڵە نایاساییەکان. جگە لە بەڵگەنامەکان، دەست بەسەر چەندین ئامێری پەیوەندی و چەکدا گیراوە کە لای تۆمەتباران بووە.
دادوەری لێکۆڵینەوە ئاشکرای کرد، کە پڕۆسەکە لەژێر سەرپەرشتیی ڕاستەوخۆی داواکاری گشتی و دادگای دەستپاکی ئەنجامدراوە. لە ئێستادا وتەی یاسایی لە تۆمەتباران وەرگیراوە و ڕێکارەکان تەواو کراون تاوەکو ڕەوانەی دادگای تایبەتمەند بکرێن بە مەبەستی دادگاییکردنیان بەپێی یاسا بەرکارەکان.
