عێراق بە توندی سەرکۆنەی ئەو هێرشانەی کرد کە بەرەبەیانی ئەمڕۆ پێنجشەممە کرانە سەر خاکی هەریەك لە وڵاتانی ئوردن، بەحرێن و کوێت.
وەزارەتی دەرەوەی عێراق ئەمڕۆ پێنجشەممە لە بەیاننامەیەکدا دڵگرانی قووڵی خۆی بەرامبەر دەستپێکردنەوەی ئاڵۆزی و هێرشە سەربازییەكان لە ناوچەکەدا نیشانداوە. وەزارەتەکە جەختی کردۆتەوە کە لەم بارودۆخ و ساتە هەستیارەدا پێویستە زمانی گفتوگۆ و دیالۆگ پێش بخرێت و هەوڵەکان بۆ کۆنترۆڵکردنی گرژییەکان چڕتر بکرێنەوە.
وەزارەتی دەرەوەی عێراق هەروەها داوای لە سەرجەم لایەنەکان کردووە دان بە خۆیاندا بگرن، هەوڵەکانیان یەکبخەن بۆ کۆتاییهێنان بە دۆخی جەنگ و پەرەسەندنەکان، لەبەرامبەریشدا ڕێگە دیپلۆماسییەکان و چارەسەری ئاشتییانە بۆ تەنگژەکان بگرنەبەر.
لە بەیاننامەکەدا ئاماژە بەوەشدراوە کە سەقامگیری وڵاتانی عەرەبی و هەروەها وڵاتانی دراوسێ، بەشێکی گرنگە لە سەقامگیری و ئاسایشی نیشتمانیی عێراق.
