وەفدێکی پسپۆڕی فەڕەنسی سەردانی دێری مێژوویی "مار شەمعون"یان لە باکووری سووریا کرد، بە مەبەستی هەڵسەنگاندنی ئەو زیانە گەورانەی بەهۆی جەنگی 13 ساڵە و بومەلەرزەکەی ساڵی 2023 بەم شوێنەوارە جیهانییە گەیشتوون.
دێری مار شەمعون (Saint Simeon)، کە یەکێکە لە گرنگترین شوێنەوارە مەسیحییەکانی جیهان و لە سەدەی پێنجەمی زایینی دروستکراوە، ساڵانێکی درێژ بەهۆی شەڕی ناوخۆی سووریاوە (2011-2024) دەستڕاگەیشتن پێی مەحاڵ بوو. ئێستا وەفدێکی شوێنەوارناسی فەڕەنسی، بە هاوکاری لایەنە ناوخۆییەکان، دەیانەوێت پڕۆسەی نۆژەنکردنەوەی بۆ دەست پێ بکەن.
زیانی 40٪ و هەڕەشەی لەناوچوون
بەپێی گوتەی عەبدولجەلیل عرابی، بەڕێوەبەری قەڵای شەمعون، ئاستی زیانەکان بەهۆی جەنگ، بۆردومانی ئاسمانی، تاڵانکردن و بومەلەرزەکەی شوباتی 2023، لە نێوان 30% بۆ 40% دەخەمڵێنرێت. یەکێک لە دیارترین زیانەکان، ڕووخانی تەواوەتی "کەوانەی ڕۆژئاوا"ی کەنیسەکەیە.
میشلین کوردی، ئەندازیاری شوێنەوارناسی سووری-فەڕەنسی کە هاوەڵی وەفدەکەی کردووە، دەڵێت: "هەندێک زیان هەن کە قەرەبوو ناکرێنەوە، بەڵام بەشە سەرەکییەکانی کەنیسەکە هێشتا ڕاوەستاون و دەتوانرێت بەشێکی زۆری نۆژەن بکرێتەوە."
کۆڵەکەیەک بۆ خواپەرستی
ناوبانگی ئەم دێرە دەگەڕێتەوە بۆ "قەشە شەمعون" کە بەپێی گێڕانەوە مێژووییەکان، ماوەی 40 ساڵ لەسەر لوتکەی کۆڵەکەیەک ژیانی بەسەر بردووە بۆ نزاکردن. هەرچەندە ئێستا تەنها بنکەی کۆڵەکەکە و چەند بەردێکی شکاو ماونەتەوە، بەڵام وەک هێمایەکی پیرۆز بۆ حاجیانی مەسیحی لە سەرتاسەری جیهان ماوەتەوە.
لە لیستی مەترسیی یونسکۆدا
ئەم شوێنەوارە لە ساڵی 2011ەوە خراوەتە لیستی کەلەپووری جیهانی یونسکۆ، بەڵام بەهۆی مەترسییەکانی جەنگەوە، لە ساڵی 2013ەوە ناوی چووەتە لیستی ئەو شوێنەوارە جیهانییانەی کە لەژێر مەترسیی لەناوچووندان.
جان باتیست فاڤر، کارداری باڵیۆزخانەی فەڕەنسا لە سووریا، لە ناو دێرەکەوە ڕایگەیاند: "ئەم کەلەپوورە تەنها بۆ ڕابردووی سووریا گرنگ نییە، بەڵکو بۆ داهاتووش بایەخی هەیە. نۆژەنکردنەوەی ئەم شوێنە دەبێتە هۆی بووژانەوەی کەرتی گەشتیاری و ئابووری ناوچەکە."
فەڕەنسا، کە مێژوویەکی درێژی لە گەڕان و لێکۆڵینەوەی شوێنەواری لە سووریا هەیە، بە نیازە لە ڕێگەی دامەزراوە کلتوورییەکانییەوە هاوکاریی بەڕێوەبەرایەتی گشتیی شوێنەوار و مۆزەخانەکانی سووریا بکات بۆ ئەوەی جارێکی تر ئەم شوێنەوارە مێژووییە بۆ گەشتیاران و حاجیان ئامادە بکرێتەوە
