وەزارەتی دەرەوەی ئەمریكا لە هۆشدارییەكی بەپەلەدا داوای لە تەواوی هاووڵاتییانی كرد بۆ هیچ مەبەستێك سەردانی عێراق و بەشێكی زۆری وڵاتانی رۆژهەڵاتی ناوەڕاست نەكەن.
وەزارەتی دەرەوەی ئەمریکا ئەمڕۆ هەینی لە تۆڕی کۆمەڵایەتی (ئێكس) هۆشدارییەکی ئەمنی بڵاوکردەوە و داوای لە هاووڵاتیانی ئەمریکی کرد بەهۆی بەردەوامی گرژییەكان بەردەوام وریابن لە ڕۆژهەڵاتی ناوەڕاستدا.
ئەم هۆشدارییەی وەزارەتی دەرەوەی ئەمریکا لەكاتێكدایە كە پێشتر ماركۆ رۆبیۆ وەزیری دەرەوەی ئەمریكا لە لێدوانێكدا رایگەیاندبوو كە جەنگ لەگەڵ ئێران کۆتایی هاتووە و تاڕادەیەكی زۆر لە رێككەوتنی كۆتایی نزیك بوونەتەوە.
وەزارەتی دەرەوەی ئەمریکا ئاستی مەترسی گەشتەکانی بۆ وڵاتان بەمشێوازەی خوارەوە دیاری کردووە:-
ئاستی سێیەم: لە گەشتكردن بۆ وڵاتانی (بەحرەین، ئیسرائیل، ئوردن، کوێت، عومان، قەتەر، سعوودییە و ئیمارات) تەواو ئاگاداری خۆتان بن.
ئاستی چوارەم: بەهیچ شێوەیەك گەشتی وڵاتانی (ئێران، عێراق، لوبنان، سووریا، کەرتی غەززە و یەمەن) نەكەن.
ئەم هۆشدارییەی وەزارەتی دەرەوەی ئەمریکا ئەوە دەگەیەنێت كە تا ئێستا دۆخی ئەمنی بەشێكی زۆری وڵاتانی رۆژهەڵاتی ناوەڕاست ئاڵۆزە و مەترسیدارە، دەکرێت لە هەر چركەیەكدا بە خێرایی بگۆڕێت بەهۆی ئەو گرژییە توندانەی لە ناوچەکەدا هەن، بەتایبەتیش دوای ئەو هێرشانەی ئێران کە ڕۆژی چوارشەممەی ڕابردوو بە چەند مووشەكێی بالیستی فڕۆکەخانەی کوێتی کردە ئامانج و بووە هۆی کوژرانی کەسێک و برینداربوونی دەیان کەسی دیکە.
وەزارەتی دەرەوەی ئەمریکا هەروەها داوای لەو هاووڵاتییانەی کردووە كە ئێستا لە وڵاتانی رۆژهەڵاتی ناوەڕاستن، لە ڕێگەی میدیاکانەوە ئاگاداربن و بەردەوام بەدواداچوون بۆ نوێترین پێشهاتە ئەمنییەکان بکەن.
