گرووپی حووسییەکانی یەمەن ئەمڕۆ دووشەممە (27ی تەممووزی 2026) ڕایانگەیاند کە زنجیرەیەک هێرشی نوێی فڕۆکەی بێفڕۆکەوان (درۆن)یان کردووەتە سەر دامەزراوە ستراتیژییەکانی نەوت لە ناو خاکی سعوودییە، ئەمەش وەک ئاماژەیەک بۆ هەڵکشانی زیاتری ململانێ سەربازییەکانی ناوچەکە.
یەیحیا سەریع گوتەبێژی سەربازیی حووسییەکان لە لێدوانێکدا ڕایگەیاند: هێزەکانمان چەندین ئامانج و خاڵی هەستیاری گواستنەوەی نەوتی خاویان لە ڕۆژهەڵاتی سعوودییەوە بەرەو بەندەری یەنبووع لەسەر کەناراوەکانی دەریای سوور پێکاوە. سەریع جەختی کردەوە کە ئەم هێرشانە وەک وەڵامێکە بۆ بەزاندنی ئاسمانی یەمەن لە لایەن فڕۆکە بێفڕۆکەوانەکانی سعوودییەوە.
ئەم هێرشە نوێیە تەنیا یەک ڕۆژ دوای ئەوە دێت کە حووسییەکان ڕایانگەیاندبوو كە توانیویانە فڕۆکەیەکی سیخوڕیی سەر بە هێزە ئاسمانییەکانی سعوودییە لە ئاسمانی وڵاتەکەیاندا بخەنە خوارەوە. ئەم پەرەسەندنانە نیشانەی تێکچوونی زیاتری بارودۆخی ئەمنین لە کاتێکدا کە ناوچەی ڕۆژهەڵاتی ناوەڕاست لەژێر ئاگری ململانێی نێوان ئێران و ئەمریکادایە.
چاودێرانی سیاسی ئاماژە بەوە دەکەن کە بە ئامانجگرتنی هێڵەکانی گواستنەوەی نەوت لە ڕۆژهەڵاتەوە بۆ ڕۆژئاوای سعوودییە، هەوڵێکە بۆ پەکخستنی هەناردەی وزە لە ڕێگەی دەریای سوورەوە. ئەم ڕووداوە لە کاتێکدایە کە نرخی نەوت لە بازاڕەکانی جیهاندا بەربەستی 100 دۆلاری بڕیوە و هەر جۆرە پەککەوتنێکی نوێ لە ژێرخانی نەوتی سعوودییەدا، دەبێتە هۆی شڵەژانی زیاتری ئابووریی جیهانی.
تاوەکو ئێستا بەرپرسانی سعوودییە بە فەرمی قەبارەی زیانەکانی ئەم هێرشە درۆنییانەیان پشتڕاست نەکردووەتەوە، بەڵام ئەم زنجیرە هێرشانە فشارە نێودەوڵەتییەکان بۆ پاراستنی ڕێڕەوە ئاوییەکان و ژێرخانی وزە لە ناوچەکەدا زیاتر دەکەن.
