گوتەبێژی سەربازیی حوسییەکانی یەمەن ڕایگەیاند، دامەزراوەیەکی نەوتیی کۆمپانیای ئارامکۆیان لە کەناراوەکانی ڕۆژئاوای سعوودیە کە دەڕوانێتە سەر دەریای سوور کردووەتە ئامانج.
ئەمڕۆ یەکشەممە 9ـی ئاب، یەحیا سەریع، گوتەبێژی سەربازیی حوسییەکانی یەمەن ڕایگەیاند: "حوسییەکان توانیویانە بە فڕۆکەیەکی بێفڕۆکەوان پاڵاوگەی ئارامکۆ لە جیزان بکەنە ئامانج و پێکانەکەش زۆر ورد بووە". ئاماژەی بەوەش کرد کە ئەم هێرشە وەک وەڵامێک بووە بۆ بەزاندنی ئاسمانی هەردوو پارێزگای (سەعدە) و (حەجە) لە باکووری ڕۆژئاوای یەمەن لەلایەن فڕۆکە بێفڕۆکەوانەکانی سعوودییەوە.
ئەمڕۆ یەکشەممە، وەزارەتی وزەی سعوودیە کۆنترۆڵکردنی ئاگرکەوتنەوەیەکی لە دامەزراوەیەکی سەر بە پاڵاوگەی ئارامکۆ لە جیزان ڕاگەیاندبوو، بەبێ ئەوەی ئاماژە بە هۆکاری کەوتنەوەی ئاگرەکە بکات.
