سەرۆك وەزیرانی عێراق ئاشكرای كرد كە لە كۆبوونەوەی ئەنجوومەنی ئاسایشی نیشتمانیدا لیژنەیەكی باڵایان بۆ رووداوی هێرشی درۆنی بۆ سەر سعوودییە و ئیمارات پێكهێنراوە.
عەلی فالح زەیدی سەرۆك وەزیرانی عێراق لە تۆڕی كۆمەڵایەتی (ئێكس) رایگەیاند: دووبارە ئیدانە و سەرکۆنەی ئەو کارە تاوانکارییە دەکەینەوە کە هەردوو وڵاتی برای شانشینی سعوودییە و دەوڵەتی ئیماراتی کردە ئامانج.
راشیگەیاندووە: ڕێنماییمان داوە بە ئاشکراکردنی لایەنە شاراوەکانی ئەم هێرشە تاوانکارییانە، لە یەکەم کۆبوونەوەی ئەنجوومەنی وزاری بۆ ئاسایشی نیشتمانی، لیژنەیەکی لێکۆڵینەوەی باڵا پێکهێنراوە.
عەلی فالح زەیدی هەروەها رایگەیاندووە: جەخت لە گرنگی ئەنجامدانی لێکۆڵینەوەیەکی هاوبەش لەگەڵ براکانمان لە هەردوو وڵات دەکەینەوە، بە ئامانجی بینینی سەرجەم بەڵگەکان و ئەوەی دەیسەلمێنێت کە خاکی عێراق لەم دوو هێرشەدا بەکارهاتووە، ئەمەش بۆ گرتنەبەری تەواوی ڕێکارە ئەمنی و یاساییەکان دژی ئەوانەی تێوەگلاون.
سەرۆك وەزیرانی عێراق ئاماژەی بەوەشداوە: جارێكی دیكە دووپاتی دەکەینەوە كە بەهەموو شێوەیەك بەكارهێنانی خاک و ئاسمانی عێراق بۆ هێرشکردنە سەر وڵاتانی برا و دۆست رەت دەكەینەوە، هەروەها جەخت دەکەینەوە کە عێراق ناوچەیەکە بۆ بەیەکگەیشتنی بەرژەوەندییە هاوبەشەکان.
وەزارەتی بەرگریی هەردوو وڵاتی سعوودییە و ئیمارات رایانگەیاندبوو كە لە سەرەتای ئەم هەفتەیەدا لەناو خاكی عێراقەوە بە درۆن هێرشكراوەتە سەر وڵاتەكانیان.
وەزارەتی بەرگریی ئیمارات بەفەرمی رایگەیاندبوو: رۆژی یەكشەممەی رابردوو بە سێ درۆن وێستگەی ئەتۆمی بەراكە لە شاری ئەبوزەبی كرایە ئامانج، درۆنەكان لەناو خاكی عێراقەوە ئاراستەكرابوون.
بەهەمانشێوە رۆژی یەكشەممەی رابردوو وەزارەتی بەرگریی سعوودییە رایگەیاندبوو: بەرپەرچی سێ درۆنمان دایەوە كە لەناو خاكی عێراقەوە ئاراستەی وڵاتەكەمان كرابوون.
