مەزلوم عەبدی، راوێژکاری سەرۆکایەتیی سوریا، ڕایگەیاند کە یەکخستنی هێزە کوردییەکان لە دامەزراوە سەربازییە فەرمییەکانی سوریا، هەنگاوێکی مێژوویی بە قازانجی کوردەکانە و لە ئێستادا ئەم هێزانە بەهێزتر و کاریگەرتر دەبن.
ئەمڕۆ چوارشەممە، ۲۱ ئۆکتۆبەری ۲۰۲۶، مەزلوم عەبدی لە دیدارێکدا لەگەڵ کۆمەڵێک لە دانیشتووانی شاری عامودا ئاشکرای کرد کە بڕیاری ستراتیژیی ئێستا بریتییە لە یەکخستنی هەموو هێزەکانی سوریای دیموکراتیک (قەسەد / هـ‌س‌د) لەگەڵ سوپای سوریا و چاڵاکیی فەرمیی ئەوان لە ناوچەکانی خۆیان؛ بە شێوەیەک کە دانیشتووانی ناوچەکە بەرپرسیاریەتی پاراستنی شارۆچکەکانی خۆیان لە ئەستۆ بگرن.
عەبدی دەربارەی وردەکارییەکانی ڕێکخستن و دابەشکردنی هێزەکان ئاماژەی کرد کە ۱,۷۰۰ ئەندامی یەکەکانی پارێزەرانی گەل (ی‌پ‌گ) وەک سنوورپارێز خزمەت دەکەن؛ هەروەها پۆلیسی سەربازی، یەکەکانی کۆماندۆ، یەکەکانی دژە تیرۆر (YAT) و هێزە تایبەتەکان دوای تێپەڕاندنی خولێکی کورتەی ڕاهێنان لە دیمەشق و نەبەک، بە شێوەی فەرمی ئەرکەکانیان دەستپێدەکەنەوە.
لە هەمان کاتدا، سەدان کەس لە کارمەندانی دەزگای زانیاریی «قەسەد» دەچنە ناو بەڕێوەبەرایەتیی گشتیی زانیارییەوە و لە شوێنە ئێستاکانیان بەردەوام دەبن لە کارکردن.
راوێژکاری سەرۆکایەتیی سوریا هەروەها زیادیکرد کە تیپە سەربازییە تایبەتەکان بۆ دانیشتووانی ناوچەکانی دیرک، قامیشلۆ، حەسەکە، کۆبانی و عەفرین دروست دەکرێن؛ لەوانە «تیپی عەفرین» کە لە ۱,۵۰۰ چەکدار پێکهاتووە، بە مەرجێک کە ئەم هێزانە تەنها لە ناوچەکانی خۆیان بمێننەوە و هیچ هێزێکی چەکدار لە دەرەوەی ئەو ناوچانەوە نەهێنرێت. ئەو جەختی کردەوە کە هێزەکانی سوریای دیموکراتیک (قەسەد) ئێستا بەهێزتر و کاراتر بوون و بە شێوەی فەرمی و یاسایی لە ژێر چەتری دەوڵەتدا چاڵاکی دەکەن.
