ئێوارەی ئەمڕۆ شەممە 5/23، مەسرور بارزانی سەرۆکوەزیرانی هەرێمی کوردستان لەگەڵ موحسین مەندەلاوی، سەرۆکی هاوپەیمانیی (ئەساس)ی عێراقی کۆبووەوە؛ ئەم دیدارە وەک هەوڵێکی جیدی بۆ "پتەوکردنی ڕیزەکان" و دۆزینەوەی خاڵی هاوبەش لە نێوان جەمسەرە سیاسییەکاندا دەبینرێت.
لەم دیدارەدا کە تێیدا پەرەسەندنە گشتییەکانی عێراق و ناوچەکە تاوتوێ کران، مەسرور بارزانی جەختی لە "پێویستیی گۆڕانکاریی جەوهەری" لە شێوازی مامەڵەکردن لەگەڵ کێشەکان کردەوە. سەرۆکی حکومەتی هەرێمی کوردستان ئاماژەی بەوە کرد کە تێپەڕاندنی ئەم قۆناغە و زاڵبوون بەسەر ئاستەنگەکاندا، پێویستی بە "هاوئاهەنگییەکی تۆکمە" و هاریکاریی ڕاستەقینەی نێوان پارت و لایەنە سیاسییەکانی عێراق لەگەڵ هەرێمی کوردستان هەیە.
لە بەشێکی دیکەی کۆبوونەوەکەدا، مەسرور بارزانی و موحسین مەندەلاوی هاوڕا بوون لەسەر ئەوەی کە تاقە ڕێگەی دەربازبوون لەو "چەقبەستووییە"ی کە بەرۆکی پرۆسەی سیاسی گرتووە، گەڕانەوەیە بۆ بنەما دەستوورییەکان و پاراستنی مافی هەموو پێکهاتەکان. جەخت کرایەوە کە پێویستە بەرژەوەندیی باڵای هاووڵاتییان بخرێتە سەرووی هەموو ململانێیەکی لاوەکییەوە، تاوەکو سەقامگیرییەکی هەمیشەیی لە وڵاتدا جێگیر بێت.
سەردانەکەی مەسرور بارزانی و دیدارەکەی لەگەڵ سەرۆکی هاوپەیمانیی ئەساس، نیشانەی ئەوەیە کە هەولێر بە "پەیامێکی نیشتمانیی ڕاشکاو"ەوە هاتووەتە بەغدا، ئەویش چەسپاندنی مافە دەستوورییەکانی گەلی کوردستان و داڕشتنەوەی پەیوەندییەکانە لەسەر بنەمای هاوبەشیی ڕاستەقینە. ئەم جووڵە دیپلۆماسییە ئومێدی ئەوەی لای چاودێران دروست کردووە کە لە داهاتوویەکی نزیکدا هەنگاوی کرداری بۆ چارەسەرکردنی "کێشە هەڵپەسێردراوەکان" بنرێت.
