سەرۆکایەتیی دادگای تێهەڵچوونەوەی زیقار ڕایگەیاند، کە لە ئۆپەراسیۆنێکی ئەمنیدا توانیویانە ژمارەیەک فەرمانبەری شارەوانیی ناسرییە و چەند "معقب"ێک دەستگیر بکەن، کە سەرقاڵی ساختەکردنی بەڵگەنامە فەرمییەکان بوون.
بەپێی ڕاگەیەندراوێکی فەرمیی دەسەڵاتی دادوەری، لە کاتی دەستگیرکردنی تۆمەتبارەکاندا، دەست بەسەر چەندین مۆر، نووسراو و کۆنووسی ساختەدا گیراوە کە پەیوەندییان بە دابەشکردنی پارچە زەویی نیشتەجێبوون و بریکارنامەی ساختەوە هەبووە.
ئەم ئۆپەراسیۆنە لەژێر سەرپەرشتیی ڕاستەوخۆی دادوەری لێکۆڵینەوەی دەستپاکی و بە هاوکاریی دەزگای هەواڵگریی پارێزگاکە ئەنجام دراوە. جگە لە بەڵگەنامەکان، دەست بەسەر چەندین ئامێری پەیوەندیکردن و چەکدا گیراوە کە لە لایەن تۆمەتبارەکانەوە بەکارهێنراون.
دادوەرە پسپۆڕەکە جەختی کردەوە، کە سەرجەم ڕێکارە یاساییەکان بەرامبەر دەستگیرکراوەکان گیراونەتە بەر و وتەکانیان وەک "دانپێدانانی دادوەری" تۆمار کراون، تاوەکو دوای تەواوبوونی لێکۆڵینەوەکان ڕەوانەی دادگای تایبەتمەند بکرێن بۆ وەرگرتنی سزای یاسایی.
