سوپای پاسدارانی ئێران، ئەمڕۆ پێنجشەممە (30ی تەممووزی 2026)، ڕایگەیاند کە تا ئەو کاتەی "زیادەڕۆیی و دەستوەردانەکانی" هێزەکانی ئەمریکا لە هاتوچۆی دەریایی بەردەوام بێت، گەرووی ستراتیژیی هورمز بە ڕووی کەشتییەکاندا نایکەنەوە. تاران جەختی کردەوە کە گەرووەکە وەک "خاکی ئێران" هەژمار دەکرێت و هێزی دەریایی سوپا کۆنترۆڵی تەواوەتی بەسەردا هەیە.
لە ڕاگەیەندراوێکی فەرمیدا، سوپای پاسداران هۆشداریی دا کە بەردەوامیی هەڕەشەکانی واشنتۆن بارودۆخەکە ئاڵۆزتر دەکات. لە دەقەکەدا هاتووە: "ڕێگە بە هیچ هێزێکی بیانی لە هەزاران کیلۆمەتر دوورەوە نادرێت دەستوەردان لە کاروباری ناوچەکەدا بکات؛ هەر لایەنێک دەستدرێژی بکاتە سەر سەروەریی ئێمە، بە توندی سزا دەدرێت."
لە پەرەسەندنێکی نوێدا، سوپای پاسداران بازنەی هەڕەشەکانی فراوانتر کرد و ڕووی دەمی کردە ئەو وڵاتانەی کە هاوکاریی سەربازی و لۆجستی پێشکەش بە ئەمریکا دەکەن. تاران ڕایگەیاند: "ئەو وڵاتانەی دەستیان لە هاوکاریکردنی دەستدرێژکاراندا هەیە، ئەگەر ڕەفتاری خۆیان چاک نەکەن، وەڵامێکی سەخت و توندیان (Severe response) بەرەوڕوو دەبێتەوە." ئەمە وەک ئاماژەیەک بۆ ئەو دەوڵەتانەی کەنداو دەبینرێت کە میوانداریی بنکە سەربازییەکانی ئەمریکا دەکەن.
ئەم هەڵوێستە توندەی تاران لە کاتێکدایە کە ململانێی نێوان ئەمریکا و ئێران چووەتە 14هەمین ڕۆژی خۆیەوە. تەنها چەند کاتژمێرێک پێش ئێستا، فەرماندەیی ناوەندیی ئەمریکا (سێنتکۆم) ڕایگەیاند کە هێزەکانیان بۆردومانی دەیان ئامانجی سوپای پاسدارانیان لە ناوخۆی ئێران کردووە و جەختیان کردەوە کە گەرووی هورمز ڕێڕەوێکی نێودەوڵەتییە و نابێت دابخرێت.
چاودێرانی سیاسی هۆشداری دەدەن کە پێداگریی ئێران لەسەر داخستنی گەرووی هورمز و ناساندنی وەک خاکی خۆی، مەترسیی ڕووبەڕووبوونەوەی ڕاستەوخۆی دەریایی لە نێوان سوپای پاسداران و کەشتیگەلی پێنجەمی ئەمریکا زیاتر دەکات، کە ئەمەش دەبێتە هۆی شڵەژانی بێپێشینە لە بازاڕی وزەی جیهانیدا، کە تێیدا نرخی نەوت لە ئێستادا لە سەروو 100 دۆلاردایە.
