سەرۆک کۆماری ئێران، پێش ئەوەی بەرەو نیویۆرک بەڕێکەوێت بۆ بەشداریکردن لە کۆبوونەوەکانی کۆمەڵەی گشتیی نەتەوە یەکگرتووەکان، بەڵێنی دا کە بە توندی بەرگری لە هەڵوێست و مافەکانی وڵاتەکەی بکات.
ئەمڕۆ سێشەممە 22ـی ئەیلوول، بەپێی تەلەڤیزیۆنی فەرمیی ئێران، مەسعوود پزیشکیان سەرۆک کۆماری ئێران، لە لێدوانێکدا پێش گەشتەکەی بۆ نیویۆرک گوتی: ئێمە بە سەربەرزییەوە لە جەنگ دەرچووین، ئەمەش بۆ هەموومان مایەی کەرامەت و شانازییە، بۆیە لە کۆمەڵگە نێودەوڵەتییەکاندا بە هێزەوە بەرگری لە هەڵوێستەکانمان دەکەین.
سەرۆک کۆماری ئێران بەم لێدوانە دەیەوێت پەیامێک بگەیەنێت کە تاران سەرەڕای ئەو گوشارە سەربازی و ئابوورییانەی لە ماوەی جەنگی دژی ئەمریکا ڕووبەڕووی بووەتەوە، هێشتا وەک لایەنێکی بەهێز لە مەیدانی سیاسی و دیپلۆماسیی نێودەوڵەتیدا دەردەکەوێت.
چاوەڕوان دەکرێت پزیشکیان لە پەراوێزی کۆبوونەوەکانی نەتەوە یەکگرتووەکاندا چەندین دیداری دیپلۆماسی ئەنجام بدات و وێڕای داکۆکیکردن لە سیاسەتەکانی ئێران، هەوڵ بدات دەرچەیەک بۆ کەمکردنەوەی گرژییەکان و لابردنی سزاکان بدۆزێتەوە.
