ئاژانسی هەواڵی ڕۆیتەرز لە زاری 5 سەرچاوەی ئاگادارەوە بڵاویکردەوە، حکوومەتی ئێران هۆشداریی توندی داوەتە وڵاتانی کەنداو کە ڕێگە نەدەن خاک و ئاسمانیان بۆ هێرشکردنە سەر تاران بەکاربهێنرێت. تاران ڕایگەیاندووە کە هەر هێرشێکی نوێی ئەمریکا بۆ سەر خاکەکەی، بە وێرانکردنی ژێرخانە گرنگەکانی وزەی ئەو وڵاتانە وەڵام دەدرێتەوە.
ئەم هەڕەشەیە وەک فشارێکی ڕاستەوخۆ دەبینرێت بۆ سەر هاوپەیمانە هەرێمییەکانی واشنتن تاوەکو ڕێگری لە بەکارهێنانی بنکە سەربازییەکانیان بکەن بۆ بۆردومانکردنی ئێران. چاودێرانی سیاسی دەڵێن تاران دەیەوێت بەم هەنگاوە تێچووی هەر جەنگێکی ئەگەری بۆ ئەمریکا و هاوپەیمانەکانی گران بکات، بەتایبەتی لە کەرتی نەوت و گازدا.
پەرەسەندنەکان لە کاتێکدایە کە ناوچەکە لەژێر ئامادەباشییەکی توندی سەربازیدایە و دۆناڵد ترەمپ، سەرۆکی ئەمریکا، پێشتر هەڕەشەی لێدانی ژێرخانی پایتەختی ئێرانی کردبوو. ئەم شەڕە دەنووکە دیپلۆماسی و سەربازییە مەترسیی پەککەوتنی تەواوەتیی بازاڕی وزەی جیهانی لێ دەکرێت ئەگەر بژاردە سەربازییەکان جێگەی دانوستان بگرنەوە.
