فەرماندەیی ناوەندیی ئەمریکا (سێنتکۆم) بە فەرمی ئەو هەواڵانەی ڕەتکردەوە کە باس لەوە دەکەن هێزەکانی ئەمریکا کۆگایەکی مەدەنیی گەنمیان لە ناوچەی هۆوێزە کردبێتە ئامانج، و ڕایگەیاند کە تەواوی ئەو شوێنانەی پێکراون بنکەی سەربازی بوون.
سێنتکۆم لە ڕاگەیەندراوێکدا ئاماژەی بەوە کرد، ئەو بانگەشانەی میدیا فەرمییەکانی حکوومەتی ئێران بڵاویان کردووەتەوە دەربارەی هێرشکردنە سەر دامەزراوەیەکی مەدەنی لە ڕێکەوتی 14ی تەمووز دوورن لە ڕاستی و ناڕاستن.
فەرماندەیی ناوەندی جەختیشی کردەوە کە ئۆپەراسیۆنەکانی ئەمریکا بە وردی ئاراستەی ئەو شوێنانە کراون کە هەڕەشەن بۆ سەر ئاسایشی نێودەوڵەتی و تەنها پێگە سەربازییەکانیان پێکاوە.
بەپێی زانیارییە فەرمییەکان، هێزەکانی ئەمریکا دوێنێ سێشەممە رێكەوتی 14ی تەمووز زنجیرەیەک گورزی سەربازییان لە ئامانجەکان لە شار و ناوچەکانی (بەندەر عەباس، خۆرموج، ئەهواز، قەشم، تەنب، بووشەهر و کێوی ستاک) وەشاندووە.
سێنتکۆم ڕوونی کردەوە کە ئامانج لەم هێرشانە لاوازکردنی تواناکانی تاران بووە بۆ هێرشکردنە سەر کەشتییە بازرگانییەکان لە گەرووی هورمز، کە وەک ڕێڕەوێکی ستراتیژیی وزە دەبینرێت.
ئەم پەرەسەندنە هاوکاتە لەگەڵ توندبوونەوەی ستراتیژییەتی ئیدارەی ترەمپ بۆ کۆنترۆڵکردنی هەڕەشە دەریاییەکان.
سێنتکۆم لە بەرامبەردا ئێرانی تۆمەتبار کرد بەوەی کە هاووڵاتییانی مەدەنی لە ناو گەرووەکە و وڵاتانی دراوسێی کەنداو دەکاتە ئامانج.
چاودێرانی سیاسی دەڵێن ئەم جەنگە میدیایی و سەربازییەی نێوان واشنتۆن و تاران لە ساڵی 2026، ئاماژەیە بۆ قووڵبوونەوەی ململانێکان و هەوڵدانی هەردوولا بۆ کۆنترۆڵکردنی گێڕانەوەی ڕووداوەکان بۆ ڕای گشتی.
