فەرماندەیی ناوەندیی ئەمریکا (سێنتکۆم)، ئەمڕۆ چوارشەممە 1ی تەممووزی 2026، سەرکردایەتیی دیالۆگێکی ئەمنیی ناوچەیی کرد کە لە لایەن هێزەکانی بەرگریی بەحرەینەوە لە شاری مەنامەی پایتەخت میوانداری کرا. لەم کۆبوونەوەیەدا سەرکردە و بەرپرسانی باڵای بەرگریی 12 وڵاتی ناوچەکە بەشدار بوون.
ئەدمیراڵ براد کووپەر، فەرماندەی سێنتکۆم، سەرپەرشتیی گفتوگۆکانی کرد، کە تێیدا تیشک خرایە سەر بەهێزکردنی هەماهەنگییەکانی نێوان هاوپەیمانانی ئەمریکا لە ڕۆژهەڵاتی ناوەڕاست و پەرەپێدانی میکانیزمە هاوبەشەکانی بەرگری. ئەم دیالۆگە وەک هەوڵێکی واشنتن دەبینرێت بۆ یەکخستنی هەڵوێستی وڵاتانی ناوچەکە بەرامبەر بە ئاڵەنگارییە ئەمنییەکان.
ئەم کۆبوونەوەیە لە کاتێکی هەستیاردا بەڕێوە دەچێت، بەتایبەت لە سایەی ئەو گرژییە نوێیانەی کە لە گەرووی هورمز و کەناراوەکانی باشووری ئێران لە چەند ڕۆژی ڕابردوودا سەریان هەڵداوە. واشنتن دەیەوێت لە ڕێگەی ئەم جۆرە دیدارە سەربازییانەوە پەیامی پابەندبوونی خۆی بە پاراستنی ئاسایشی کەشتیوانیی نێودەوڵەتی و سەقامگیریی هاوپەیمانەکانی لە کەنداو دووپات بکاتەوە.
هەر لە میانی گفتوگۆکاندا، باس لە هەنگاوەکانی جێبەجێکردنی ئەو ڕێککەوتنە نوێیانە کرا کە بۆ کۆتاییهێنان بە ململانێکان لە ناوچەکەدا واژۆ کراون. بەشداربووان جەختیان لە گرنگیی بەردەوامیی دیالۆگ و ئاڵوگۆڕی زانیاریی هەواڵگری کردەوە بۆ ڕێگریکردن لە هەر جۆرە پەرەسەندنێکی سەربازیی نەخوازراو کە مەترسی بۆ سەر ئاشتیی ئیقلیمی و جیهانی دروست بکات.
