فەرماندەیی ناوەندیی هێزەکانی ئەمریکا (سێنتکۆم) و دەوڵەتی ئیمارات، ئەمڕۆ سێشەممە 28ی تەممووزی 2026، ڕێککەوتنێکی مێژووییان بۆ دامەزراندنی یەکەمین تیمی ئەرکی هاوبەش واژۆ کرد، کە ئامانج لێی خێراکردنی پەرەپێدانی بەرنامەکانی ژیریی دەستکردە (AI) لە کەرتی سەربازیدا.
ئەم تیمە هاوبەشە، کە ناوی (Task Force Talon Synapse)ی لێنراوە، بڕیارە لە چەند هەفتەی داهاتوودا بە فەرمی دەستبەکار بێت. بنکەی سەرەکیی تیمەکە لە شاری ئەبووزەبی پایتەختی ئیمارات دەبێت و لە نزیکەی 20 پسپۆڕی ئەمریکی و ئیماراتی پێکدێت، کە خاوەن شارەزاییەکی باڵان لە بوارەکانی ژیریی دەستکرد، شیکردنەوەی داتا و ئاسایشی سێبەردا (Cybersecurity).
ئەدمیراڵ براد کووپەر، فەرماندەی سێنتکۆم، لە لێدوانێکدا ڕایگەیاند: ئەمە دەبێتە وەرچەرخانێکی مێژوویی، چونکە ئێمە لەگەڵ یەکێک لە بەهێزترین هاوبەشە هەرێمییەکانمان کار دەکەین تاوەکو بتوانین دواین پێشکەوتنەکانی ژیریی دەستکرد بە خێرایی بگەیەنینە دەستی سەربازەکانمان. کووپەر جەختی کردەوە کە هەردوولا پابەندن بەوەی داهێنان لە بواری تەکنەلۆژیای سەربازیدا بە شێوەیەکی فراوان و خێرا بەرەوپێش ببەن.
بیرۆکەی پێکهێنانی ئەم تیمە دەگەڕێتەوە بۆ ساڵی ڕابردوو، کاتێک ئەدمیراڵ کووپەر و شێخ تەحنوون بن زاید ئالی نەهیان ڕاوێژکاری ئاسایشی نیشتمانیی ئیمارات گفتوگۆیان لەسەر کرد. هەروەها مانگی ڕابردوو شاندێکی سێنتکۆم سەردانی ناوچەکەیان کرد و لەگەڵ سەرکردەکانی پیشەسازیی ژیریی دەستکرد و بەرپرسانی بەرگریی ئیمارات کۆبوونەوە بۆ داڕشتنی کۆتا قۆناغی ڕێککەوتنەکە.
تیمی (Talon Synapse) فۆکەسی سەرەکیی دەخاتە سەر یەکخستنی بەرنامەکانی ژیریی دەستکرد بۆ سێ بواری سەرەکی:
پاڵپشتیی هەواڵگری و شیکردنەوەی زانیارییەکان.
پاراستنی ژێرخانە هەستیار و ستراتیژییەکان.
چاودێریکردنی وردی ژینگەی ئەمنیی ناوچەکە.
ئەم هەنگاوە نوێیەی واشنتۆن و ئەبووزەبی وەک ئاماژەیەک بۆ بەهێزبوونی هاوپەیمانیی تەکنەلۆژی و سەربازیی نێوان هەردوولا دەبینرێت، لە کاتێکدا کە ناوچەی ڕۆژهەڵاتی ناوەڕاست ڕووبەڕووی تەحەدای ئەمنیی نوێ بووەتەوە.
