باڵیۆزخانەی ئەمریکا لە بەغدا، ئەمڕۆ چوارشەممە پێشوازی لە بڕیاری گەڕانەوەی باڵیۆز ستیڤن فاگنی كرد بۆ وەرگرتنی پۆستی ھەڵسوڕێنەری کاروباری باڵیۆزخانەی ئەمریکا لە بەغدا.
باڵیۆزخانەی ئەمریكا لە ڕاگەیەندراوێکدا بڵاوی کردەوە: پێشوازی لە بڕیاری گەڕانەوەی باڵیۆز ستیڤن فاگن دەکەین بۆ وەرگرتنی پۆستی ھەڵسوڕێنەری کاروباری باڵیۆزخانەی ئەمریکا لە عێراق.
ئاماژەی بەوەش کرد: باڵیۆز ستیڤن فاگن پێشتر وەك کونسوڵی گشتیی ئەمریكا لە هەولێر و جێگری سەرۆکی نێردەی ئەمریكا لە بەغدا و هەروەها باڵیۆزی ئەمریکا لە یەمەن کاری کردووە، ئێستاش دەبێتە ھەڵسوڕێنەری کاروباری باڵیۆزخانەی ئەمریکا لە بەغدا.
باڵیۆزخانەی ئەمریکا لە بەغدا ڕوونیشی کردەوە: باڵیۆز فاگن خاوەنی ئەزموونێکی بەرفراوانی هەرێمییە کە یارمەتیدەر دەبێت لە بەهێزکردنی پەیوەندییەکانی نێوان ئەمریكا و عێراق، هەنگاونان بەرەو ئاییندەیەک کە دەستکەوتی یەکسان بۆ هەردوو گەلی ئەمریکی و عێراقی بەدەستبهێنێت.
