ئاژانسی هەواڵی فرانس پرێس (AFP) لە ئامارێکی نوێدا بڵاویکردەوە، کە ژمارەی ئەو کەسانەی لە سەرەتای ساڵی 2026ەوە تاوەکو ئێستا لە عەرەبستانی سعوودیە لەسێدارە دراون، گەیشتە 100 کەس.
بەپێی پۆلێنکردنەکەی ئەو ئاژانسە نێودەوڵەتییە، کە پشت بە ڕاگەیەندراوە فەرمییەکانی حکومەتی سعوودیە دەبەستێت، جێبەجێکردنی سزای لەسێدارەدان لەو وڵاتە بە ڕێژەیەکی بەرز بەردەوامە. ئەم ئامارە نوێیە دوای ئەوە دێت کە لە چەند ڕۆژی ڕابردوودا چەند سزایەکی نوێی لەسێدارەدان لە ناوچە جیاجیاکانی ئەو وڵاتە جێبەجێ کران.
سعوودیە ساڵانە ڕووبەڕووی ڕەخنەی توندی ڕێکخراوەکانی مافی مرۆڤ دەبێتەوە بەهۆی بەکارهێنانی سزای لەسێدارەدان بۆ تاوانە جیاوازەکان، لەوانە کوشتنی بە ئەنقەست، بازرگانیکردن بە ماددە هۆشبەرەکان و تاوانەکانی پەیوەست بە تیرۆر. ڕێکخراوی لێبوردنی نێودەوڵەتی و چەندین ناوەندی تری جیهانی داوایان لە تاران و ڕیاز کردووە کە کار بۆ ڕاگرتن یان کەمکردنەوەی ئەم سزایە بکەن.
جێگەی ئاماژەیە، عەرەبستانی سعوودیە یەکێکە لەو وڵاتانەی جیهان کە بەرزترین ڕێژەی لەسێدارەدانی تێدا تۆمار دەکرێت، و بەرپرسانی ئەو وڵاتەش جەخت دەکەنەوە کە ئەم سزایانە بەپێی شەریعەتی ئیسلامی و بۆ پاراستنی ئاسایش و سەقامگیریی کۆمەڵگە جێبەجێ دەکرێن.
