سوپای پاسدارانی ئێران ئەمڕۆ چوارشەممە كوژرانی فەرماندەیەكی باڵای سوپاكەیانی راگەیاند، بەگوێرەی زانیارییەكان فەرماندەكە چەند رۆژێك پێش ئێستا و لە كاتی رووبەرووبوونەوە لەگەڵ چەكدارانی ئۆپۆزسیۆن لە باشووری ئێران كوژراوە.
سوپای پاسداران رایگەیاند: عەمید حوسێن زەریفی فەرماندەی بارەگای (ئۆپراسیۆنی سەجاد) لە شاری سەراوان لە کاتی ئەنجامدانی ئۆپراسیۆنێکدا دژی جوداخوازان لە پارێزگای سیستان و بەلووچستان لە باشووری ئێران كوژراوە.
پێشتر لە ڕۆژی 12ی ئەیلوولی ئەم مانگەدا، شەڕ و پێكدادانی سەخت لەنێوان سوپای پاسداران و چەکدارانی ڕێکخراوی (جەیشولعەدل)ی بەلووچیی ئۆپۆزسیۆن لە شاری سەراوان رووی دابوو.
ئەو كات ڕاگەیەنرابوو كە لە شەڕ و پێكدادانەكاندا فەرماندەیەك و چەند ئەندامێكی سوپای پاسداران كوژراون، لەبەرامبەریشدا چەند چەكدارێكی ڕێکخراوی جەیشولعەدلیش كوژراون.
شاری سەراوان و ناوچەکانی دەوروبەری پارێزگای سیستان و بەلووچستان لە باشووری ئێران کە زۆرینەی دانیشتووانەكانی سوننە مەزهەبن و هاوسنوورن لەگەڵ پاکستان و ئەفغانستان، ماوە ماوە شەڕ و ئاڵۆزی لەنێوان چەكدارانی ئۆپۆزسیۆن و هێزە ئەمنییەكانی ئێران روو دەدات بەهۆی چالاکیی گرووپەكانی دژبەری ڕژێمی تاران.
