هێزە چەکدارەکانی حکوومەتی یەمەن ڕایگەیاند، هێرشێکی درۆنییان بۆ سەر پێگەکانی ژێر دەسەڵاتی حووسییەکان ئەنجام داوە.
ناوەندی ڕاگەیاندنی هێزە چەکدارەکانی یەمەن سێ ڤیدیۆی لە تۆڕی کۆمەڵایەتیی ئێکس بڵاو کردووەتەوە و ڕایگەیاند: "ئەم دیمەنانە پەیوەستن بە هێرشی هێزەکانی ناوچە سەربازییەکانی شەشەم و حەوتەم دژ بە گرووپە میلیشیاکانی حووسی و پێگەکانی ژێر دەسەڵاتی حووسییەکان".
سوپای یەمەن سەر بە حکوومەتی ئەم وڵاتەیە کە لەلایەن کۆمەڵگەی نێودەوڵەتییەوە وەک حکوومەتی یاسایی ئەو وڵاتە دانپێدانراوە و لە هەفتەکانی ڕابردوودا چەندین هێرشی دژ بە حووسییەکانی سەر بە ئێران ئەنجام داوە.
