وەزارەتی دەرەوەی ئێران، ئەمڕۆ دووشەممە (3ی ئابی 2026)، ڕایگەیاند کە بە هاوئاهەنگی لەگەڵ سوڵتاننشینی عومان کار دەکەن بۆ دیاریکردنی "ڕێڕەوێکی ئارامی کاتی" بۆ هاتوچۆی کەشتییەکان لە گەرووی ستراتیژیی هورمزدا، ئەمەش وەک هەوڵێک بۆ هێورکردنەوەی بارگرژییە دەریاییەکان.
ئەم دەسپێشخەرییە دیپلۆماسییە لە کاتێکدایە کە ناوچەی ڕۆژهەڵاتی ناوەڕاست لە ناو جەرگەی ململانێیەکی توندی سەربازی و گەمارۆیەکی دەریایی چڕدایە. عومان، کە هەمیشە وەک ناوبژیوانێکی سەرەکی لە نێوان تاران و واشنتن دەردەکەوێت، هەوڵ دەدات لە ڕێگەی ئەم پێشنیارە نوێیەوە ڕێگری لە پەککەوتنی تەواوەتیی ئاڵوگۆڕی وزە بگرێت، کە لە چەند ڕۆژی ڕابردوودا نرخی نەوتی گەیاندە سەروو 100 دۆلار.
چاودێرانی سیاسی ئاماژە بەوە دەکەن کە ئاماژەدان بە "ڕێڕەوێکی کاتی" لە لایەن تارانەوە، نیشانەی ئەوەیە کە ئێران دەیەوێت لە پەراوێزی ئەو "وەستانە کاتییەی بۆردومانەکان" کە دۆناڵد ترەمپ ڕایگەیاندووە، دەرفەتێک بە دیپلۆماسی بدات. ئەم هەنگاوە دوای ئەوە دێت کە تاران پێشتر هەڕەشەی داخستنی تەواوەتیی گەرووەکەی کردبوو لە بەرامبەر دەستبەسەرداگرتنی سامانەکانی لە لایەن ئەمریکاوە.
گەرووی هورمز گرنگترین ڕێڕەوی ئاویی جیهانە بۆ گواستنەوەی نەوت و هەر جۆرە لێکتێگەیشتنێک لە نێوان ئێران و عومان دەتوانێت فشارەکان لەسەر بازاڕی جیهانیی وزە کەم بکاتەوە. تاوەکو ئێستا فەرماندەیی ناوەندیی ئەمریکا (سێنتکۆم) هیچ کۆمێنتێکی فەرمیی لەسەر ئەم پێشنیارە هاوبەشەی تاران و مەسقەت نەبووە، بەڵام واشنتن پێشتر جەختی کردبووەوە کە گەرووەکە ڕێڕەوێکی نێودەوڵەتییە و دەبێت بۆ هەمووان بە کراوەیی بمێنێتەوە.
