لە ناو بەردەوامبوونی گومانەکان دەربارەی داهاتووی پەروەندەی ئەتۆمیی ئێران و ڕۆڵی یاریزانە هەرێمایەتی و نێودەوڵەتییەکان، وتەبێژی وەزارەتی کاروباری دەرەوەی کۆماری ئیسلامی بانگەشەی ئەوەی کرد کە هیچ گفتوگۆیەکی ڕاستەوخۆ لە نێوان تاران و واشینگتن بەڕێوە ناچێت.
ئیسمائیل بەقایی، وتەبێژی وەزارەتی کاروباری دەرەوە، بە ئاماژەکردن بەو شایەعاتەی دەربارەی ڕۆڵ و ناوبژیوانیی ڕووسیا لە رایزنییە ئەگەرییەکان لەگەڵ ئەمریکا بڵاوکراونەتەوە، جەختی کردەوە کاتێک بنەمای هیچ گفتوگۆیەک لەگەڵ لایەنی ئەمریکی پێک نەهاتووە، قسەکردن لەسەر پشکنینی وردەکارییەکانی لەگەڵ موسکۆ یان هەر وڵاتێکی دیکە، بابەتەکە بەخۆی نەماوە.
ئەو بە ڕاگەیاندنی ئەوەی کە کۆماری ئیسلامی لە موەقفەکانی خۆی لەم پەروەندەیە پاشەکشە ناکات، لە هەمان کاتدا پشتڕاستی کردەوە کە بابەتی ئەتۆمی لە کۆبوونەوە نوێکاندا لەگەڵ وەزیری کاروباری دەرەوەی ڕووسیا، جێی گفتوگۆ و ئاڵوگۆڕی بۆچوون بووە.
وا دەردەکەوێت موەقفی نوێی دەزگای دیپلۆماسی، زیاتر لەوەی کە ڕێگایەک بۆ چارەسەرکردنی گرێی دیپلۆماسیی ئەتۆمی بکاتەوە، جەخت لە بەردەوامبوونی هێڵی سیاسەتی پێشووتر دەکاتەوە. ئەمە لە کاتێکدایە کە چالاکیی سەرەکیی پەروەندەی ئەتۆمی تەنها بە بن‌بەستی نێوان تاران و واشینگتن سنووردار نابێت؛ بەڵکو کۆمەڵگا و بۆچوونی گشتی زیاتر لە هەر کاتێکی دیکە چاوەڕوانی ڕوونکردنەوەی دەسەڵاتن سەبارەت بە ئەنجام و تێچوونە ئابووری-کۆمەڵایەتییە قورسەکان کە بەردەوامبوونی ئەم ئاڵۆزییانە بەسەر بژێوی ژیان و داهاتووی خەڵکی ئێراندا سەپاندوویەتی.
