دۆناڵد ترەمپ، سەرۆکی ئەمریکا، دەستپێکردنی فراوانترین و توندترین ئۆپەراسیۆنی ئابووری لە مێژوودا دژی کۆماری ئیسلامیی ئێران ڕاگەیاند، کە ئامانج لێی گۆشەگیرکردنی تەواوەتی ئەو وڵاتەیە لە جیهاندا. ئەم ڕاگەیاندنە لە ڕێگەی پەیامێکی توندەوە بوو کە ڕۆژی چوارشەممە 19ی ئاب، لە هەژماری فەرمی خۆی لە تۆڕی کۆمەڵایەتی "تروس سۆشیاڵ" بڵاویکردەوە.
سەرۆکی ئەمریکا لە پەیامەکەیدا ئاماژەی بەوە کردووە کە پێشتر دەرفەتی زۆری بۆ ڕێککەوتن داوەتە تاران، بەڵام بەرپرسانی ئەو وڵاتە نەیانتوانیوە ئەو دەرفەتانە بقۆزنەوە. ترەمپ جەختی کردەوە کە ئەم هەنگاوە نوێیە دەبێتە جەنگێکی ئابووری بێپێشینە و ئاماژەی بەوەش کرد کە هێزی دەریایی و ئاسمانیی ئێران و کارگەکانی چەکیان تووشی وێرانکاری بوون، هاوکات داڕووخانی بەهای تمەنیشی وەک بەڵگەیەک بۆ بێبەها بوونی دراوی ئەو وڵاتە هێنایەوە.
لە بەشێکی تری پەیامەکەیدا، ترەمپ هۆشداریی توندی ئاراستەی هەموو ئەو وڵاتانە کرد کە هێشتا پەیوەندییان لەگەڵ تاراندا ماوە و ڕایگەیاند، هەر دەوڵەتێک لە ڕێگەی بانک، کۆمپانیا یان دەزگا حکوومییەکانەوە هاوکاریی ئێران بکات، ڕووبەڕووی لێکەوتە ئابوورییە ترسناکەکانی ئەمریکا دەبێتەوە. داواشی کرد کە دەستبەجێ قاچاخچێتی نەوت، ئاڵوگۆڕی دراو و کارکردنی کۆمپانیا وەهمییەکان ڕابگیرێن، و دووپاتی کردەوە کە ڕێگری دەکەن لەوەی ئێران ببێتە خاوەنی چەکی ئەتۆمی.
ئەم پەرەسەندنە نوێیە لە کاتێکدایە کە پەیوەندییەکانی نێوان واشنتن و تاران لە ساڵی 2018وە، کاتێک ئەمریکا لە ڕێککەوتنی ئەتۆمی کشایەوە و سیاسەتی "زۆرترین گوشار"ی گرتەبەر، چووەتە قۆناغێکی پڕ لە گرژییەوە. ئابووریی ئێران لە ساڵانی ڕابردوودا بەهۆی زنجیرەیەک سزای توندی ئەمریکا بۆ سەر کەرتی نەوت و بانکەکان، ڕووبەڕووی قەیرانی دارایی و بەرزبوونەوەی بەرچاوی هەڵئاوسان بووەتەوە، کە کاریگەریی ڕاستەوخۆی لەسەر ژیانی ڕۆژانەی هاووڵاتییان دروست کردووە.
